https://www.youtube.com/watch?v=IZ1sAxmgTfo გურჯაანის მუნიციპალიტეტის სოფელ დარჩეთის მოსახლეობა, მთავარ პრობლემად დაზიანებულ გზასა და სანიაღვრე არხებს ასახელებს, თუმცა აღნიშნული საკითხები "სოფლის მხარდაჭერის პროგრამის" პრიორიტეტებში ვერც ამჯერად მოხვდა.
სოფელი დარჩეთი (არაშენდის თემი) ცენტრალური მაგისტრალიდან რამდენიმე კილომეტრითაა დაშორებული, გზა ძლიერ დაზიანებულია, რის გამოც ადგილობრივებს მოძრაობა უჭირთ. ეს საკითხი ზამთარში უფრო აქტუალურია. -"გზის პრობლემა ძალიან გვაწუხებს. სასაფლაო სოფლიდან ძალიან შორსაა, უგზოობის გამო მიცვალებულის გასვენება გვიჭირს. გაუსაძლის პირობებში ვართ," _ გვითხრა ნანა ჯიქურაშვილმა და სანიაღვრე არხების პრობლემაზეც ისაუბრა.
-"წვიმის დროს წყალი ეზოებში გვივარდება, ნათესებს ანადგურებს და საპირფარეშოებიც წყლით ივსება. გზა მოხრეშეს, მაგრამ ამით პრობლემა არ მოგვარებულა, რადგან ნიაღვარმა ქვიშა წაიღო. თუ სანიაღვრე არხები არ მოწესრიგდა, მდგომარეობა არ შეიცვლება,"_ აღნიშნა მან.

როგორც მოსახლეობა ამბობს, გზა წინა წლებში მოიხრეშა, მაგრამ ამით პრობლემა არ შეცვლილა. -"თანხა რაში დახარჯეს არ ვიცი. არაშენდიდან ხრეში მოიტანეს და აქ დაყარეს. იქით კიდევ ასფალტი დაასხეს, მაგრამ ამით ჩვენი მდგომარეობა ოდნავაც არ გაუმჯობესებულა," _ გვითხრა ანიკო სეფიაშვილმა.

მიუხედავად იმისა, რომ მოსახლეობა ამ პრობლემებზე საუბრობს, აღნიშნული საკითხები "სოფლის მხარდაჭერის პროგრამაში" გათვალისწინებული არ არის. გურჯაანის მუნიციპალიტეტის არქიტექტურის, ეკონომიკისა და ინფრასტრუქტურის განვითარების სამსახურის უფროსი განმარტავს, რომ პრიორიტეტების შერჩევა მოსახლეობის სურვილისამებრ მოხდა.
-"ამ პროგრამის ფარგლებში დარჩეთისთვის გამოყოფილია 14 700 ლარი. აქედან 12 700 ლარი _ სასმელი წყლის რეაბილიტაციას, 2000 კი _ გარე განათების მოწყობას მოხმარდება. ეს დაფიქსირებულია კრების ოქმში. მოსახლეობამ მოსაგვარებელი საკითხები თავად დაასახელა. გათვალისწინებულია იმ ადგილობრივების უმრავლესობის აზრი, ვინც კრებას ესწრებოდა. შეიძლება იყოს ისეთი ფაქტი, რომ ვიღაც არ მივიდა და ახლა გამოთქვამს პრეტენზიას. თუკი ვინმეს განსხვავებული პოზიცია ჰქონდა, კრებაზე უნდა დაეფიქსირებინა. მათ ამის უფლება და ვალდებულებაც კი ჰქონდათ," _ გვითხრა ირაკლი მინდიაშვილმა.

გასულ წელს სასმელი წყლის რეაბილიტაციისთვის "სოფლის მხარდჭერის პროგრამის" ფარგლებში 8100 ლარი გამოიყო, მაგრამ იგივე საკითხის გადაჭრა მიმდინარე წელსაც პრიორიტეტია, მაშინ, როდესაც მოსახლეობა წყლის პრობლემაზე არ საუბრობს. აქვე განვმარტავთ, რომ ეს საკითხი არა მარტო დარჩეთში, არამედ სხვა სოფლებშიც დგას. უმეტეს შემთხვევაში მოსახლეობა ჩვენთან სხვა პრიორიტეტებზე საუბრობს, თუმცა "სოფლის მხარდაჭერის პროგრამით" სულ სხვა საკითხები გვარდება. ამიტომ საზოგადოებას თავადვე უჩნდება კითხვა, ვინ ირჩევს პრიორიტეტულ საკითხებს, ხალხი თუ ადგილობრივი ხელმძღვანელობა?