https://www.youtube.com/watch?v=i8bPFv5m7Lg საგარეჯოს რაიონის იორმუღანლოს თემის მოსახლეობას მიწების პრობლემა უკვე დიდი ხანია აწუხებს. მიუხედავად იმისა, რომ ეს თემა "სპექტრმა" არაერთხელ გააშუქა, მისი აქტუალურობიდან გამომდინარე, ადგილობრივები კვლავაც ამ საკითხის შესახებ გვესაუბრებიან. მათი თქმით, ნაკვეთები, რომლებიც წლების განმავლობაში იჯარით ჰქონდათ აღებული, გაიყიდა (როგორც ადგილობრივ, ისე, უცხოელ ბიზნესმენზე) და ამის გამო სააარსებო წყარო აღარ გააჩნიათ. მათ მფლობელოში არსებულ მიწებს ზოგი სახნავ-სათესად, ზოგი კი საძოვრად იყენებდა.

-"სოფელში მიწები არავის აღარ აქვს, ძალიან ცუდ დღეში ვართ. იმის გამო, რომ მოსახლეობას საარსებო წყარო აღარ გააჩნია, ძალიან ბევრი აზერბაიჯანში მიდის საცხოვრებლად. მე თვითონ 1 ჰექტარი ნაკვეთი მქონდა. როგორც სხვების, ჩემი კუთვნილი ადგილიც გაიყიდა და ახლოს მისვლის უფლებაც არ გვაქვს. ოჯახში 15 ადამიანი ვართ, მოხუცებიც და პატარა ბავშვებიც გვყავს. ძალიან გვიჭირს. ოჯახში არაფერი აღარ გვაქვს, პირიდან ლუკმა გამოგვარიდეს," _ გვითხრა სოფელ მუღანლოს მკვიდრმა მუსტაფა სადიოღლიმ.

როგორც ჩვენთან საუბარში ლამბალოს სკოლის რუსული ენის პედაგოგმა ნიზამ შარიფოვმა აღნიშნა, თვითონ ადგილი არ ჰქონია, მაგრამ ხალხის გასაჭირს რომ უყურებს, გული ძალიან სტკივა.
-"მე თვითონ მინდორთან საქმე არ მაქვს, მაგრამ ჩემი ხალხი მეცოდება, რომ საარსებო წყარო აღარ აქვს. ადგილობრივი მაცხოვრებლების ერთადერთი შემოსავალი მესაქონლეობაა. სახნავი ადგილებიც გაიყიდა, მაგრამ ძირითადად საძოვრები ჰქონდა ხალხს. სად უნდა წაიყვანონ ეხლა საქონელი? სარწყავი ჩვენ არ გვაქვს, რომ ბოსტნეული მაინც მოვიყვანოთ და ოჯახები შევინახოთ. ხალხი მშიერი დარჩა. ყველაფერი მათი თანხმობის გარეშე ჩუმად გაკეთდა. ეს ძველმა ხელისუფლებამ გააკეთა და ეხლა ვის უნდა მოვედავოთ? მე პირადად ამ მიწების დაბრუნების იმედი არ მაქვს. თამაში ხომ არ არის, დღეს წაგართვან და ხვალ ისევ უკან მოგცენ? ყველაფერი კანონით ხდება და იმ პიროვნებასაც, რომელმაც ეს ადგილები შეიძინა, კანონით აქვს ყველაფერი დამოწმებული, ფულიც გადახდილი აქვს. აბა, ვინ ადგება და დაგიბრუნებს უკან რამეს?! თანაც უცხო ქვეყნის მოქალაქეები არიან და მაგათ ვინ შეეხებათ?!" 

ზაკირა ველიევის თქმით, ოჯახში 7 სული ცხოვრობს და ამიტომ თვითან თვემდე თავის რჩენა ძალიან უჭირთ.
-"ავღანეთის ომის ვეტერანი ვარ. ოჯახში 4 გოგო და 1 ბიჭი მყავს, მათ რჩენა ხომ უნდა. მიწა არ მაქვს, რომ ერთი კილო ლობიო მაინც დავთესო. სად წავიდეთ, რა გავაკეთოთ, რითი უნდა ვიცხოვროთ, არ ვიცი. ჩვენი მდგომარეობა დღითი დღე უარესდება. უკვე ამდენი ხანი გავიდა და არავის იმედი აღარ გვაქვს."

როგორც ამავე სოფლის მკვიდრმა ზაჰიდ ბილალოღლიმ აღნიშნა, მათი მიწების ერთი ნაწილი ადგილობრივმა მაცხოვრებელმა შეისყიდა.
-"15 ჰექტარი მიწა ჩვენებურ ადამიანს საჰავათ გუსეინოვს უკანონოდ მიჰყიდეს. სანამ მოხვნა არ დაიწყეს, მანამდე ვერაფერი გავიგეთ. დავინახე, რომ ტრაქტორი ადგილებს ხნავდა, მეგონა ჩემი მეზობელი ამუშავებს-მეთქი, მოგვიანებით კი გაირკვა, რომ ერთიანად გაეყიდათ და უკვე სხვისი საკუთრება იყო. ამ ადგილებს წლების განმავლობაში ჩვენ ვამუშავებდით, რით უნდა ვიცხოვროთ ეხლა და როგორ გამოვკვებოთ ოჯახები?"

სპექტრი" თულარში მცხოვრებ საჰავათ გუსეინოვს დაუკავშირდა. როგორც მან ჩვენთან სატელეფონო საუბარში აღნიშნა, მიწები კანონიერად შეიძინა და ამის დასამტკიცებლად ყველა საბუთი გააჩნია. -"რატომ დავობს მოსახლეობა არ ვიცი, როგორ შეიძლება ვინმეს მიწის ნაკვეთი დაკანონებული ჰქონდეს და მერე გაუყიდონ. ეს იყო სახელმწიფო ქონება. ეკონომიკის სამინისტრომ გამოაცხადა აუქციონი და გაიყიდა. ინფორმაცია ერთი თვე იდო საიტზე. თუ ვინმეს ჰქონდა სურვილი, რატომ არ ნახა და აუქციონში მონაწილეობა არ მიიღო? მე მიწა მინდოდა და ვიყიდე. აუქციონზე ვინც მეტს გადაიხდის, ის ყიდულობს და რა მნიშვნელობა აქვს, მე თუ არა, სხვა ვინმე იქნებოდა. 14 ჰექტარამდე მაქვს შესყიდული. ჰექტარზე 720 ლარი გადავიხადე. ეს ყველაფერი კანონის ფარგლებში მოხდა და შემიძლია საბუთებით დავამტკიცო. მიწები თვითონ ჰქონდათ უკანონდ მითვისებული და წლების განმავლობაში არაფერს არ იხდიდნენ. მე შარშანაც მეთესა მოსავალი და წელსაც," 

აქვე განვმარტავთ, რომ მიწების გასხვისებასათნ დაკავშირებით შეკითხვა პრემიერმინისტრს გასულ თვეში გამართულ პრესკონფერენციაზეც დავუსვით. როგორც მან განმარტა, აღნიშნული საკითხი შესწავლის პროცესშია და თითოეული შემთხვევა ინდივიდუალურად გადაიხედება.