ჯანდაცვის სამინისტროს გადაწყვეტილებით, 1 სექტემბრიდან II ჯგუფის პრეპარატები რეცეპტით გაიცემა. გურჯაანელები მედიკამენტებს იმარაგებენ. ჯანდაცვის სტრუქტურებში კი აცხადებენ, რომ მოსახლეობას არანაირი პრობლემა არ შეექმნება. ადგილობრივები წამლების რეცეპტებით გაცემას უარყოფითად აფასებენ და ამბობენ, რომ ეს პროცესი უბნის ექიმთან უსაზღვრო რიგებს და სხვადასხვა სახის ფინანსურ პრობლემას გამოიწვევს. სააფთიაქო ქსელის წარმომადგენლები გვიდასტურებენ, რომ მედიკამენტებზე მოთხოვნა მას შემდეგ გაიზარდა, რაც ცნობილი გახდა, რომ სექტემბრიდან წამლები რეცეპტებით უნდა გაიცეს. აფთიაქის, შპს „ოჯახის ექიმის“ დირექტორის დალი ჩუთლაშვილის განცხადებით, მედიკამენტების გაყიდვების რიცხვმა საგრძნობლად იმატა. „ხალხი წამლებს იმარაგებს. ძირითადად მოთხოვნა გაიზარდა კარდეოლოგიურ და არასტეროიდული ნიმესილის ჯგუფის პრეპარატებზე“. გურჯაანელმა მანანა ბერძენიშვილმა საჭირო მედიკამენტები უკვე დაიმარაგა. „ასთმა მაწუხებს და წამლებს ყოველდღიურად ვხმარობ, მაგრამ არც დრო და არც ნერვები მაქვს იმისთვის, რომ ექიმთან რეცეპტისთვის რიგში ვიდგე. ამ რიგებში ხალხი დაიხოცება“. ადგილობრივი მცხოვრების ზეინაბ მგელაძის თქმით, წამლების წინასწარ შესაძენად სხვა ხარჯების შემცირება მოუწია. „პენსია რომ ავიღე, წამლები დავიმარაგე, მაგრამ სამაგიეროდ მშიერი დავრჩი. გულის ოპერაცია მაქვს გაკეთებული და რიგში დგომა არ შემიძლია.“ ზეინაბ მგელაძე ეჭვობს, რომ რეცეპტებით წამლების გაცემა ფინანსურ მაქინაციებთან არის დაკავშირებული. „ეს არის ფულის მაფია, აფთიაქებში წამლები გაასაღეს და ვიღაცამ დიდძალი ფული გააკეთა“. ცნობილია, რომ რეცეპტის გამოყენება 6-ჯერ არის შესაძლებელი. მიუხედავად ამისა, გურჯაანელები ამბობენ, რიგში დგომა მაინც ხშირად მოუწევთ, რადგან ხალხში ფული არ არის და უმრავლესობა წამალს ცალობით ყიდულობს. „ხალხი ყოველდღიურად თითო აბს ყიდულობს და ყოველდღე რეცეპტი როგორ უნდა მიიტანოს? ეს რა სისულელეა?“, - გვეუბნება მზია ცერცვაძე. მოსახლეობის აღშფოთება უსაფუძვლოდ მიაჩნია შპს ჯეოჰოსპიტალსის გურჯაანის სამედიცინო ცენტრის ადმინისტრაციულ მენეჯერს დეა ცაბუტაშვილს. როგორც ის ჩვენთან საუბარში განმარტავს, რიგების პრობლემა მას შემდეგ გაჩნდა, რაც საყოველთაო ჯანდაცვის სახელმწიფო პროგრამა ამუშავდა და უფასო მომსახურების გამო ექიმთან მიმართვიანობის რაოდენობამაც მოიმატა. „რაც შეეხება რეცეპტით წამლის გაცემას, ამან შეიძლება გარკვეული პერიოდით კიდევ უფრო გაზარდოს რიგები. როდესაც მოსახლეობისთვის ცნობილი გახდება რეცეპტით გასაცემი მედიკამენტების ნუსხა, ეს ღელვაც გაქრება". ჯეოჰოსპიტალსის უბნის თერაპევტი ელენე ხელაშვილი არ გამორიცხავს, რომ პირველი სექტემბრიდან ექიმთან ვიზიტორების რიცხვმა მოიმატოს. „ვვარაუდობ, რომ პაციენტების რიცხვი მოიმატებს. თუმცა, შეიძლება ასე არც მოხდეს, ვინაიდან, მოგეხსენებათ, მოსახლეობამ დაიმარაგა და წინასწარ შეიძინა ერთი-ორი კვირის სამყოფი მედიკამენტები". ელენე ხელაშვილი აქვე განმარტავს, რომ უბნის თერაპევტთან ვიზიტი უფასოა და პაციენტს შეუძლია ნებისმიერ დროს მიაკითხოს. შეგახსენებთ, რომ დღეიდან რეცეპტების ინსტიტუტი სრულად ამოქმედდა. ურეცეპტოდ აღარ გაიცემა II ჯგუფის მედიკამენტები, მათ შორის, საძილე და სედაციური საშუალებები (გარდა მცენარეული პრეპარატებისა), ანტიდეპრესანტები, კორტიკოსტეროიდები სისტემური გამოყენებისთვის, სიმსივნის საწინააღმდეგო პრეპარატები და იმუნომოდულატორები, მიკრობების საწინააღმდეგო პრეპარატები სისტემური გამოყენებისთვის, პარკინსონიზმის საწინააღმდეგო პრეპარატები, ანტიჰისტამინური საინექციო პრეპარატები სისტემური გამოყენებისთვის, საგულე გლიკოზიდები, ანტიარითმული და ანტიჰიპერტენზული პრეპარატები, შაქრიანი დიაბეტის სამკურნალო პრეპარატები, საინექციო წამლის ფორმები. აღნიშნულ ჯგუფში დაახლოებით 5000-მდე მედიკამენტია. რაც შეეხება ურეცეპტოდ გასაცემი III ჯგუფის მედიკამენტების ნუსხას, ის მოიცავს საქართველოში რეგისტრირებულ 3306 მედიკამენტს - კუჭ-ნაწლავის დაავადებების სამკურნალო და ნაწლავის მიკროფლორის მარეგულირებელი საშუალებები, ვიტამინები და მინერალები (გარდა საინექციო ხსნარებისა), ანტიაგრეგანტები (თრომბო აცც, ასპირინი კარდიო, კარდიომაგნილი და სხვ.), პერიფერიული სისხლისმიმოქცევის გამაუმჯობესებელი საშუალებები, ანგიოპროტექტორები, მთელი რიგი ანალგეზიური, სიცხის დამწევი და ანთების საწინააღმდეგო არასტეროიდული საშუალებები, ბრონქული ასთმის სამკურნალო პრეპარატები, ხველის საწინააღმდეგო და ამოსახველებელი საშუალებები, H1- ჰისტამინური რეცეპტორების ბლოკატორები (ერიუსი, ალერფასტი, კეტოტიფენი, ტავეგილი და სხვ.), ანემიის საწინააღმდეგო საშუალებები, ბიოლოგიურად აქტიური დანამატები. დამტკიცდა მეორე ჯგუფს მიკუთვნებული მედიკამენტების რეცეპტის გამოწერის წესი და ფორმა №3, რეცეპტის ბლანკის ახალი ფორმა, რომელიც ხელმისაწვდომი იქნება ელექტრონული პროგრამის მეშვეობით. რეცეპტების ამობეჭდვას შეძლებს სისტემაში დარეგისტრირებული თითოეული მომხმარებელი. აქვე უნდა აღინიშნოს, რომ სექტემბრიდან აფთიაქებში დამონტაჟდება სპეციალური სააფთიაქო ყუთები, რომელიც პირველადი გადაუდებელი დახმარებისთვის იქნება განკუთვნილი და მისი გამოყენება საჭიროების შემთხვევაში ნებისმიერ მოქალაქეს უფასოდ შეეძლება. განსაკუთრებული მკურნალობისთვის პაციენტებს რეცეპტი გამოეწერებათ ერთ წლის ვადით. სოსო ქუმსიაშვილი