ქალაქ გურჯაანში, ადმინისტრაციული შენობების დასუფთავების სამსახურის საქმიანობა კრიტიკის საგანია. ტენდერში გამარჯვებული კომპანია თითქმის არც ერთ ვალდებულებას არ ასრულებს. თუმცა, ორგანიზაციის ხელმძღვანელი ნოდარ გორხელაშვილი ამბობს, რომ ყველა სამუშაო ხარისხიანად სრულდება. 2013 წლის 11 იანვრიდან მუნიციპალიტეტის ადმინისტრაციულ შენობებს, ტენდერში გამარჯვებული ახალი კომპანია ასუფთავებს, რომელსაც ნოდარ გორხელაშვილი ხელმძღვანელობს. ტენდერი 59 400 ლარზე გამოცხადდა, თუმცა კომპანიამ 36 ათასი ლარით გაიმარჯვა. თავიდანვე გაჩნდა ეჭვი, რომ ამ თანხით მუნიციპალური შენობა-ნაგებობების მოვლა-პატრონობა და ხარისხიანად დასუფთავება ვერ მოხერხდებოდა. ყოფილი მერიის შენობის მეორე და მეოთხე სართულზე განთავსებული დაწესებულებების თანამშრომლების თქმით, არ სუფთავდება დერეფნები და საპირფარეშოები, რის გამოც, შენობაში ანტისანიტარიაა და მღრღნელებიც გაჩნდნენ. ისინი პრობლემაზე არაოფიციალურად ღიად საუბრობენ, მაგრამ ოფიციალურ კომენტარისგან თავს იკავებენ. -"საპირფარეშოში წყლის ავზი დგას. რამდენიმე დღის წინ ვირთხა ჩავარდა და ჩაიხრჩო. როგორ წარმოგიდგენიათ, შეიძლება ასეთი წყლით სარგებლობა? ჩვენი დამლაგებლების ვალდებულება მხოლოდ იმ ოთახების დასუფთავებაა, რომელიც საკრებულოსგან ვიქირავეთ. საპირფარეშოებისა და დერეფნების სისუფთავეზე პასუხისმგებელი კი ნოდარ გორხელაშვილია, რომელიც იმაშიც კი ვერ ერკვევა, რა მოვალეობა აკისრია. მან ტენდერი ნაკლებ თანხაში მოიგო, დამლაგებლებს ხელფასები შეუმცირა და შესაბამისად, ეხლა დაკისრებულ ვალდებულებას თავს ვერ ართმევს," _ ამბობენ თანამშრომლები. შენობას ერთი დამლაგებელი ჰყავს. როგორც მან ჩვენთან საუბარში აღნიშნა, იმ სამუშაოს, რაც მას ევალება, პირნათლად ასრულებს. -"უკვე შვიდი წელია ამ დაწესებულებაში ვმუშაობ. ჩემს მოვალეობაში კიბეების დაგვა-დაწმენდა და მხოლოდ მესამე სართულის დერეფნის და საპირფარეშოს დალაგება შედის. ტერიტორიული ორგანოს რწმუნებულის ოთახებიც არ მიწერია ხელშეკრულებაში, მაგრამ მთხოვეს და იმასაც ვალაგებ. რაც შეეხება მეორე და მეოთხე სართულის კალიდორებს, არც არასდროს დამილაგებია, იმიტომ რომ ჩემთვის ამის შესახებ არავის არაფერი უთქვამს. ხელფასი 108 ლარი მქონდა. ახალი ხელმძღვანელის მოსვლის შემდეგ შემიმცირდა და 98 ლარს ვიღებ. ამ ფასად მე დამატებით ფართს ვერ დავალაგებ. თუ ასე არ უნდათ, სულ წავალ სამსახურიდან, ან კიდევ ერთი დამლაგებელი დაიმატონ და დანარჩენი სართულები და ტუალეტები იმან დაალაგოს. ხელშეკრულება დეკემბრამდე მაქვს, ჩემს საქმეს იქამდე პირნათლად შევასრულებ. დილით 4 საათზე მოვდივარ და ვალაგებ. მერე კერძოზე მივდივარ სამუშაოდ. აქამდე მარწყვის საკრეფად დავდიოდი, ეხლა ატამში დავდივარ. აბა მარტო 98 ლარით ოჯახი როგორ უნდა შევინახო?! ავადმყოფი შვილი მყავს და ჩემი მეუღლეც არ მუშაობს," _ გვითხრა მარინა მთივლიშვილმა. ამ საკითხთან დაკავშირებით ტენდერში გამარჯვებული კომპანიის წარმომადგენელს ნოდარ გორხელაშვილს მივმართეთ, რომელმაც ოფიციალური კომენტარი არ გააკეთა და გვითხრა, რომ ის ფართი, რომლის მოვლა-პატრონობაც მას ტენდერით ევალება, სათანადოდ სუფთავდება. კომენტარისგან თავი შეიკავეს გამგებლის მოადგილე ზვიად ყვირალაშვილმა და გამგებელმა ჯონი ოსიაშვილმა. როგორც მან ჩვენთან საუბარში აღნიშნა, შესრულებული სამუშაოებით უკმაყოფილო ორგანიზაციებმა ოფიციალური წერილით უნდა მიმართონ და რეაგირებასაც ამის შემდეგ მოახდენს. თუმცა, თავის დროზე დასუფთავების ხარისხზე კითხვები გურჯაანის მუნიციპალიტეტის გამგებელს ჯონი ოსიაშვილსაც გაუჩნდა. -"ხელფასების შემცირების გამო მინდოდა ტენდერი შემეწყვიტა, მაგრამ როდესაც ეს საკითხი იურისტებთან გავიარე, აღმოჩნდა, რომ ამის საფუძველი არ არსებობს. აქვე აღვნიშნავ, რომ შარშანდელთან შედარებით შენობა კარგად სუფთავდება. ამ წუთებში მე არ მაქვს არანაირი უფლება საკითხში ჩავერიო. თუკი შევატყობ, რომ სამუშაო ხარისხიანად არ კეთდება, მაშინ იძულებული ვიქნები, ახალი ტენდერი გამოვაცხადო," _ გვითხრა მან. როგორც ჩვენთან საუბარში ნოდარ გორხელაშვილმა აღნიშნა, მათ კომპეტენციაში დერეფნების და საპირფარეშოების დასუფთავება არ შედის. თუმცა, ქალაქ გურჯაანის ტერიტორიული ორგანოს გამგეობის ადმინისტრაციული შენობის დაცვის, დასუფთავების და მომსახურების ხარჯთაღრიცხვის ნუსხაში შემდეგ პუნქტებს ვკითხულობთ: 1. ფანჯრის მინების, ალათების ჩარჩოებისა და ფანჯრის რაფების გარეცხვა, გაწმენდა, მოპრიალება. 2. კარების ფრთებისა და ჩარჩოების გარეცხვა-გაწმენდა და მოპრიალება. 3. ორგტექნიკის ვიზუალური განახლება; შუშების და განათების მოწყობილობების გაწმენდა-დასუფთავება; ვერტიკალური ზედაპირების; იატაკების და ავეჯის წმენდა; ლაქების ამოყვანა პარკეტის და ქვის საფარებისაგან; ნაგვის ყუთების რეცხვა-დეზინფექცია; ზედაპირული ნაგვის, ნარჩენებისა და სხვა არასასურველი ნივთების მოცილება იატაკიდან და კედლებიდან; მშრალი დასუფთავება (მტვრის მოცილება) და საჭიროების მიხედვით ზედაპირების წერტილოვანი რეცხვა ხსნარებით; შემოსასვლელის მინებიან კარებებზე თითების ანაბეჭდის მოცილება; საპირფარეშო ოთახებში საპნისა და ქაღალდის კონტროლი. 4. ჰოლებში დერეფნებსა და საოფისე ფართებში პარკეტის იატაკების დასუფთავება, გაწმედა-მოპრიალება. 5. ჰოლებში გრანიტის ქვის იატაკების მოწმენდა-მოპრიალება. 6. კიბის უჯრედების დასუფთავება, კერამიკული და ყველა ჰოპიზონტალური სიბრტყეების გასუფთავება, მოაჯირებისა და სახელურების გარეცხვა, გაწმენდა, გაპრიალება. ნარჩენების გატანა ხელით (ურნამდე). 7. საპირფარეშოებში კერამიკული ფილებით მოპირკეთებული იატაკების და კედლების გარეცხვა, გასუფთავება გაპრიალება. აქვე განვმარტავთ, რომ ამ ჩამონათვალიდან თითქმის არც ერთი პუნქტი არ სრულდება. მარინა პეტრიაშვილი