ნატალია ბარბაქაძე

 ქალაქისა და ადმინისტრაციული შენობების დასუფთავების ხარისხი საზოგადოების განსჯის საგანი ბევრჯერ გამხდარა. 2013 წლიდან აღნიშნულ სამუშაოებს ტენდერში გამარჯვებული ახალი სამსახური შეასრულებს, რომლის ხელმძღვანელიც გავრცელებული ინფორმაციით, გურჯაანის მუნიციპალიტეტის გამგებლის მოვალეობის შემსრულებელ ჯონი ოსიაშვილთან დაახლოებული პირი ნოდარ გორხელაშვილია.

2013 წლიდან მუნიციპალიტეტის ადმინისტრაციულ შენობებს ახალი სამსახური დაასუფთავებს. აღნიშნული სამუშაოს შესასრულებლად რამდენიმე კვირის წინ ტენდერი გამოცხადდა. გამარჯვებული ინდ. მეწარმე შენობანაგებობების მოსაწესრიგებლად ადგილობრივი ბიუჯეტიდან 36 000 ლარით დაფინანსდა. აღნიშნულ ტენდერში მონაწილეობა რამდენიმე კომპანიამ მიიღო. გამარჯვებული კი ინდივიდუალური მეწარმე ნოდარ გულაშვილია. რეგისტრაციის მისამართში ვკითხულობთ: ქალაქი თბილისი, წინამძღვრიშვილის #49. ამიერიდან ადმინსტრაციული შენობების დასუფთავება ინდ.მეწარმე ნოდარ გულაშვილის პრეროგატივაა. თავდაპირველად გამგეობამ ტენდერი 59 400 ლარზე გამოაცხადა, ნოდარ გულაშვილმა კი გამარჯვების შემდეგ 35 999 ლარი მიიღო. მუნიციპალიტეტის მასშტაბით დასუფთავების სამსახურის მუშაობის გაუმჯობესებაზე გამგებლის მოვალეობის შემსრულებელმა ჯონი ოსიაშვილმა 23 იანვრის საკრებულოს სხდომაზეც ისაუბრა. "ქალაქისა და მუნიციპალიტეტის ქუჩების, ადმინსტრაციული შენობების დასუფთავებისას ვიქნები ძალიან კატეგორიული. აუცილებლად უნდა გამოსწორდეს ის სიტუაცია, რაც დღესაა."-განაცხადა მან.

ადმინსტრაციული ფართის დასუფთავებას მუნიციპალიტეტში ნოდარ გორხელაშვილი უზრუნველყოფს. საზოგადოებაში საუბრობდნენ, რომ ტენდერი ინდ.მეწარმე ნოდარ გორხელაშვილმა მოიგო, რადგან ის გამგებლის მოვალეობის შემსრულებელ ჯონი ოსიაშვილთან დაახლოებული პირია (მეჯვარეა). თავად ჯონი ოსიაშვილმა კი `სპექტრთან~ განაცხადა, რომ არ იცოდა თუ ეს პიროვნება აღნიშნულ სამუშაოსთან რაიმე კავშირში იყო. როგორც ამბობს, ბოლო წლების განმავლობაში ნოდარ გორხელაშვილთან ურთიერთობა არ ჰქონია, ამიტომ მისი გამოჩენა მოულოდნელი იყო. "ასე უთქვამთ ჯონი ოსიაშვილმა გორხელაშვილი სამსახურში მიღოო. ჩემთან კაბინეტში რომ შემოვიდა, გამიკვირდა. რვა წელია ამ კაცს არ ველაპარაკები. 58 000 ლარად იყო ტენდერი შეფასებული და 36 000 ლარში გაიმარჯვა. ფაქტიურად ამათ დამლაგებლებისთვის ხელფასები დაუკლიათ და იმის ხარჯზე ასუფთავებენ შენობებს. მე მხოლოდ მაშინ მაქვს ტენდერის ჩაშლის უფლება, თუ მუშაობის ხარისხი არ მომეწონება, თუკი თანამშრომლები უკმაყოფილებას გამოთქვამენ. საერთოდაც არ ვიცი 36 000 ლარით როგორ შეძლებს სამუშაოების ჩატარებას." _ აცხადებს ჯონი ოსიაშვილი.

როგორც `სპექტრმა~ ნოდარ გორხელაშვილთან საუბრისას გაარკვია, ტენდერში გამარჯვებული კომპანია მას არ ეკუთვნის, თუმცა, მის საქმიანობაზე პასუხისმგებელი თავადაა."ორგანიზაცია ოფიციალურად ჩემს მეგობარ ნოდარ გულაშვილზეა დარეგისტრირებული, მაგრამ ნოტარიუსით დამტკიცებულია, დასაბუთებულია, რომ მე ვუხელმძღვანელო ამ საქმეს და პასუხიმგებელი ვიყო ადმინისტრაციული შენობების მოვლა-პატრონობაზე. ხელშეკრულება 11 იანვრიდან 2013 წლის 31 დეკემბრამდეა დადებული. ერთი წლის განმავლობაში ვიზრუნებთ, რომ შენობები იყოს მოწესრიგებული. ამ დროისთვის იგივე თანამშრომლები მუშაობენ, რომლებიც წინამორბედ სამსახურს ჰყავდა დაქირავებული. ერთადერთი დარაჯი გამოვცვალეთ, რომელიც გურჯაანის ტერიტორიულ ორგანოში მუშაობდა. ქალაქის მერი მივიდა ღამის ორ საათზე, შეამოწმა და ადგილზე არ დახვდა. ამის გამო ძალიან დიდი შენიშვნა მივიღე. ამ პიროვნების გათავისუფლების მიზეზი ეს გახდა. სხვა ცვლილებები არ განგვიხორციელებია და ყველა აგრძელებს მუშაობას," _ ამბობს ნოდარ გორხელაშვილი.

აქვე პასუხობს მოსახლეობაში გავრცელებულ აზრს, რომელიც ჯონი ოსიაშვილთან მის მეგობრობას შეეხება. `ტენდერი, რომელშიც გავიმარჯვეთ იყო ელექტრონული და ჯონი ოსიაშვილთან არანაირ კავშირში არ არის. ჯონის ბავშვობიდან ვიცნობ, თუმცა ერთმანეთის საქმიანობაში არ ვერევით, ამ სახის ურთიერთობა ნამდვილად არ გვაქვს.~ მისივე თქმით, 36 000 ლარი საკმარისი თანხაა იმისთვის, რომ წლის განმავლობაში დაკისრებული სამუშაოები სამსახურმა ხარისხიანად შეასრულოს.