გურჯაანის სპორტკომპლექსის სამუშაოების მწარმოებელმა შპს "თემა-მ" პროკურატურაში სარჩელი შეიტანა. ორგანიზაციის ხელმძღვანელი იძულებით დახარჯული თანხის დაბრუნებას ითხოვს. წინასაარჩევნოდ პრეზიდენტის მიერ გახსნილი სპორტკომპლექსი კი დღემდე უფუნქციოდაა. გურჯაანის სპორტკომპლექსის პრობლემა მოსახლეობისთვის დღემდე აქტუალურია. როგორც ჩვენთან საუბარში გურჯაანის მუნიციპალიტეტის გამგებელმა ჯონი ოსიაშვილმა აღნიშნა, ამ საკითხთან დაკავშირებით ახალი დეტალები გამოიკვეთა. -"აუზის პრობლემა უკვე მოგვარდა. ამჟამად შენობის ჭერთან დაკავშირებით კიდევ არის რაღაც პატარა სამუშაოები ჩასატარებელი. ამის გადაჭრა შეიძლება, მაგრამ როგორ ჩავიბარო? შენობა სხვა არის და პროექტი სხვა. ტენდერი სხვა ტიპის შენობაზე გამოცხადდა. ჩვენ შევხვდით ფირმა შპს `თემას~ წარმომადგენლებს, რომლებიც სპორტკომპლექსში სამშენებლო სამუშაოებს აწარმოებდნენ. როგორც მათ ჩვენთან საუბარში აღნიშნეს, ძველი მთავრობა აიძულებდათ თავიანთი სახსრებით სხვაგვარი შენობა აეშენებინათ. როგორც მათ ეუბნებოდნენ, პროექტი გზაში მოგეწევათო. მათივე განმარტებით, მილიონ ლარამდე საკუთარი თანხები აქვთ დახარჯული და ამის შესახებ სასამართლოში სარჩელიც შეიტანეს. პრეზიდენტი აიძულებდათ თუ გუბერნია, ეს ალბათ სასამართლოზე გადაწყდება," _ გვითხრა ჯონი ოსიაშვილმა. მისივე განმარტებით, მან პროკურატურას და სამინისტროს შენობის ექსპლოატაციაში შესვლის თხოვნის თაობაზე განცხადება მისწერა. - "მანდ იმდენად შენობის პრობლემა არ არის, რამდენადაც დოკუმენტაციის. ამის შესახებ მე პროკურატურას და სამინისტროს მივწერე. მინდა მოგვცენ უფლება, რომ ჭერის საკითხი გადავწყვიტოთ და შენობამ ფუნქციონირება დაიწყოს. ამას მოსახლეობაც მოუთმენლად ელოდება. თანხა, რომელიც რეაბილიტაციისთვის იყო გამოყოფილი, ბოლომდე არ არის გადმორიცხული, დარჩენილია 250 ათასი ლარი. სასამართლო დავა ძალიან გრძელი პროცესია, იმიტომ, რომ ამ შემთხვევაში ვინც არ უნდა გაიმარჯვოს, მეორე მხარე გაასაჩივრებს. ჩვენ ვეძებთ გამოსავალს, რომ ამ ფირმას რამენირად ჩავეხსნათ და შენობა დავამთავროთ. დანგრევას არ ვაპირებთ, ამას უკვე არაფერი ეშველება, უბრალოდ გვინდა იმის უფლება მოგვცენ, რომ დავასრულოთ ობიექტი და სპორტულმა ბაზამ ფუნქციონირება დაიწყოს. შპს "თემას"-თან დადებულ ხელშეკრულებას ვადა გაუვიდა და მასთან აღარაფერი გვაკავშირებს. უბრალოდ, ფირმა დავობს იმ ფულებს, რომელიც ძველმა მთავრობამ დაახარჯინა. სიტყვიერად ეუბნებოდნენ: მიდი, შენ ეს გააკეთე და ჩვენ ამ თანხას ჩაგირიცხავთო, მაგრამ ეს დოკუმენტებში არსად ჩანს," _ გვითხრა მან. ამ საკითხთან დაკავშირებით შპს "თემას" სამუშაოთა მწარმოებელს გიორგი გოგოლაძეს დავუკავშირდით. მან ჩვენთან სატელეფონო საუბარში აღნიშნა, რომ სპორტკომპლექსის ის სარეაბილიტაციო სამუშაოები, რომელიც მათ ევალებოდათ, შეასრულეს და სხვა დეტალები კი მისთვის უცნობია. "ფირმიდან წამოვედი. ვიცი, რომ სასამართლოში მართლა შეიტანეს საჩივარი, თუმცა კონკრეტული ფაქტების შესახებ ვერაფერს გეტყვით. ვერც უფროსის საკონტაქტო ტელეფონს მოგცემთ, იმიტომ რომ უფლება არ მაქვს," _ გვითხრა მან. სპორტული კომპლექსი გურჯაანში 1978 წელს აშენდა და წლების განმავლობაში კახეთის მასშტაბით ერთ-ერთი საუკეთესო იყო. 2012 წელს მისი რეაბილიტაციისთვის სახელმწიფო ბიუჯეტიდან 3 მილიონი ლარი გამოიყო. ამავე წლის 18 სექტემბერს საქართველოს პრეზიდენტმა ის ოფიციალურად გახსნა, თუმცა უხარისხოდ შესრულებული სამუშაოების გამო ერთი დღეც არ უმუშავია. მარინა პეტრიაშვილი