გურჯაანში ოპოზიციური პარტიების მაჟორიტარი დეპუტატობის კანდიდატების პლაკატები ჩამოხიეს.
სააგიტაციო მასალის დაზიანებაში დამოუკიდებელი კანდიდატის ელგუჯა გიორგაძის მხარდამჭერები „ქართულ ოცნებას“ ადანაშაულებენ.

„ქართული ოცნების“ აგიტატორებმა არა მარტო ჩვენი კანდიდატის მასალა გაანადგურეს, არამედ სხვა ოპოზიციური პარტიებისაც. ამას მასობრივი ხასიათი აქვს. ყველა სოფელში ძირს ჩამოყრილია. ზოგგან „ქართული ოცნების“ პლაკატებიც ჩამოხეულია, მაგრამ მასობრივად ოპოზიციისაა დაზიანებული. ეს ხდება მიზანმიმართულად, ხელისუფლების დაკვეთით. დამნახები არიან, მაგრამ ამისი ფოტო და ვიდეო მასალა არ გვაქვს.“- აღნიშნა ელგუჯა გიორგაძის შტაბის ხელმძღვანელმა ნათია ბიწკინაშვილმა.

მსგავს ბრალდებას უყენებს „ქართულ ოცნებას“ „რესპუბლიკური პარტიის“ დეპუტატობის კანდიდატი ზვიად ყვირალაშვილი.

„ჩემს პლაკატებზე გადაკრულია მმართველი პარტიის კანდიდატის სურათი. ეს მოხდა სოფელ გურჯაანში, კარდენახსა და ვაჩნაძიანში. ისე ამბობენ თითქოს მათ სურათებს ჩვენ ვაკრავთ ჩვენივე ფოტოებს, საიდან უნდა გვქონოდა მათი პლაკატები. ეს მავნე ტენდენცია, რასაც პლაკატების ომი ჰქვია, არ აღმოიფხვრება არც ახლა და არც მომავალში. მმართველი პარტია იყენებს ადამიანებს იმისთვის, რომ თავიანთი კონკურენტი პარტიის პლაკატები დააზიანონ. მაქსიმალურად ცდილობენ ხელი შეუშალონ ოპონენტებს. მოსახლეობა ადეკვატურ პასუხს რვა ოქტომბერს გასცემს. მათ ზონდერობაში „ნაციონალურ მოძრაობასაც“ გაასწრეს.“

ჩამოხეული და შეღებელია გურჯაანში „პატრიოტთა ალიანსის“ კანდიდატის ნათია გიორგაძის პლაკატებიც.
„ნათიას პლაკატები მასიურად ჩამოხიეს. ველისციხეში მისი სახლის გვერდით სკოლაა, ღობეზე ბევრი გავაკარით, თითქმის ყველა დაზიანებულია. კოლაგში ერთად იყო გაკრული 20 სურათი. წუხელ 3 საათი იქნებოდა, სახლში რომ მივედი. დაზიანებული არ იყო. დილით რომ გამოვედი, ეს ამბავი დამხვდა. ჩემს სახლთან ალბათ გახსოვთ რა ხდებდა 2012 წელს, დღესაც ეტყობა სახლის ფასადს საღებავის კვალი. ეს ძველი ამბავია და აღარ გამოვეკიდები. მაშინ ვიცოდი რომ ამას „ნაციონალები“ აკეთებდნენ, დღეს ვინ სჩადის ამას არ ვიცი, ალბათ ის, ვისაც ყველაზე მეტად ჩვენი კანდიდატის ეშინია.“- ამბობს „პატრიოტთა ალიანის“ გურჯაანის საარჩევნო შტაბის ხელმძღვანელი სოსო ბერიკაშვილი.

დაზიანებულია „ერთიანი ნაციონალური მოძრაობის“ კანდიდატის გიორგი ღვინიაშვილის სააგიტაციო მასალაც.
„გასული 4 წლის მანძილზე, ხელისუფლება ბევრად უფრო მძიმე ფორმებით ებრძოდა და ებრძვის „ნაციონალურ მოძრაობას“. რაც შეეხება სააგიტაციო მასალას, გარწმუნებთ მათი განადგურება ვერ შეცვლის იმ საყოველთაო იმედგაცრუებას, რომელიც საზოგადოებაშია. 8ოქტომბერი იქნება პასუხი უმოძრაობის, უნიათობის და ჩრდილოვანი მმართველობის დასასრულის. საარჩევნო გარემოზე და მის მიმდინარეობაზე პასუხისმგებელი უნდა იყოს ხელისუფლება.“- აღნიშნა „ნაციონალური მოძრაობის“ წევრმა თემურ ბუწაშვილმა.

ოპოზიციის ბრალდებებს კატეგორიულად უარყოფენ „ქართულ ოცნებაში“ და აცხადებენ, რომ თავად მათი კანდიდატის სააგიტაციო მასალაც დაზიანებულია.

-"თუ აქვთ კონკრეტული ფაქტი, მიმართონ საოლქო საარჩევნო კომისიას, რასაც შესაბამისი რეაგირება მოჰყვება. სამართლებრივი დარეგულირება ხდება არამართლზომიერ ქმედებაზე, დაბრალება და ჭორის დონეზე საუბარი არ არის საქმე. რატომ აბრალებენ მაინცდამაინც „ქართულ ოცნებას“, გაუგებარია. თითქმის ყველა სოფელშია ჩვენი სააგიტაციო მასალა ჩამოხეული, ასევე ქალაქ გურჯაანშიც. ჩვენ მივმართეთ საოლქო კომისიას, სახელისუფლებო პარტია ჭორის დონეზე არ საუბრობს. მე თუ მკითხავთ „ქართული ოცნების“ პლაკატები უფრო მეტადაა ჩამოხეული, ვიდრე ოპოზიციური პარტიის.“ -აღნიშნა "ქართული ოცნების“ ბიუროს წევრმა ზაქრო ქაჩლიშვილმა.

საარჩევნო კოდექსის 46-ე მუხლის თანახმად, სააგიტაციო მასალის ჩამოხსნა, ჩამოხევა, დაფარვა ან დაზიანება, თუ ის აკრძალულ ადგილას არ არის განთავსებული, დასჯადია.