წინასაარჩევნო დაძაბულობა დღითიდღე მატულობს, ოპოზიციური პარტიები მმართველი გუნდის წარმომადგენლების მხრიდან გახშირებულ ზეწოლასა და დაშინების ფაქტებზე საუბრობენ. „ქართულ ოცნებაში“ კი, ბრალდებებს უარყოფენ.

მაჟორიტარი დეპუტატობის დამოუკიდებელი კანდიდატის, ელგუჯა გიორგაძის საარჩევნო შტაბის ხელმძღვანელი, ნათია ბიწკინაშვილი აღნიშნავს, რომ „ქართული ოცნების“ შტაბის წევრები, მოსახლეობას მათთან შეხვედრას უკრძალავენ. წინააღმდეგ შემთხვევაში კი, შვილებისა და ახლობლების საჯარო სამსახურიდან გათავისუფლებით ემუქრებიან.
მისი მტკიცებით, მმართველი გუნდის წევრებისგან ზეწოლა რიგითი ამომრჩევლების გარდა, საჯარო მოსამსახურეებზეც მიმდინარეობს. მან ამ ფაქტის დამადასტურებელი ვიდეოკადრები გადმოგვცა.
„ქართული ოცნების“ წევრები, ხალხს აფრთხილებენ, რომ ჩვენს შეხვედრებს არ დაესწრონ, წინააღმდეგ შემთხვევაში, ახლობლების სამსახურიდან გათავისუფლებით ემუქრებიან. რამდენიმე კონკრეტულ შემთხვევას გეტყვით: სოფელ ჭანდარში, ჩვენს მხარდამჭერს-ანზორ ღორთქლიშვილს დამუქრნენ, რომ თუ ჩვენ მოგვცემდა ხმას, მის შვილს სამსახურს დაატოვებინებდნენ.
სოფელ ვაჩნაძიანში იყო შემთხვევები, როდესაც ადმინისტრაციული ერთეულის სპეციალისტი, ქალბატონი ლია გოლეთიანი ოჯახებში მიდიოდა და აფრთხილებდათ, თუ „ქართულ ოცნებას“ მხარს არ დაუჭერდნენ, სოციალური დახმარება შეუწყდებოდათ.
ასევე გვაქვს ინფორმაცია, რომ გურჯაანის მუნიციპალიტეტის გამგებელი, გია გერგიძე თანამშრომლებს ავალდებულებს მიიტანონ ოჯახის წევრების პირდობის მოწმობები, საიდანაც იწერენ პირად ნომრებს. წინააღმდეგ შემთხვევაში, მათ სამსახურს დაატოვებინებენ.“- აცხადებს ნათია ბიწკინაშვილი.

ბრალდებებს პროვოკაციულს უწოდებს „ქართული ოცნების“ საარჩევნო შტაბის შეხვედრების კოორდინატორი, კოტე ბერიძიშვილი: „ამომრჩევლის დაშინება ჩვენი მიზანი არ არის, ერთი მარტივი მიზეზის გამო, სხვა პარტიებისა და კანდიდატისგან განსხვავებით, დარწმუნებული ვართ უდავო გამარჯვებაში.
ეს პროვოკაციული გამოხტომები ჭირდებათ პატარ-პატარა პარტიებს, რომ დაჩაგრულის მანტია მოისხან და ნულზე დაცემული რეიტინგი გაიმყარონ. თუ ასეთ ფაქტებს ვინმე მოიძიებს, მიმართოს სამართალდამცავ ორგანოებს. ჩვენ თვითონაც ხელს არავის დავაფარებთ და ის პიროვნება მკაცრად დაისჯება. დაშინების პოლიტიკა სამუდამოდ უნდა მოისპოს. რაც შეეხება ლია გოლეთიანს, ის რიგითი სპეციალისტია. მას არანაირი კომპეტენცია და ბერკეტი არ გააჩნია, ვინმე გაათავისუფლოს. თუკი, მართლა არსებობს ასეთი ფაქტები და მოსახლეობა დაადასტურებს, ჩვენ თვითონ მოვითხოვთ, რომ მთელი სიმკაცრით დაისაჯოს, მაგრამ ვიცი – ეს ტყუილია.“- აღნიშნა მან.

გურჯაანის მუნიციპალიტეტის გამგებელი, გია გერგიძე ბრალდებას უარყოფს და ამბობს, რომ „ქართული ოცნება“ დაშინების მეთოდით არ მუშაობს: „რომელმა პარტიამაც ეს გითხრათ, გარშემო ისეთი ხალხი ჰყავს შემოკრებილი, რომ მათგან ასეთი რამ გასაკვირი არ არის. ზოგადად, ტყუილი ძალიან უყვართ. ხანდახან ისეთი შთაბეჭდილებაც მრჩება, რომ „ნაციონალურ მოძრაობასთან“ არიან ჩახუტებულები.ერთნაირი მეთოდები აქვთ, ერთნაირი ცილისწამებები, რაღაცის შექმნა, აქეთ დაბრალება და ა.შ. შეტანილი აქვთ საჩივრები უწყებათაშორის კომისიებში, მირეკავენ, რომ თურმე ზეწოლას ვახორციელებ დამოუკიდებელ მაჟორიტარზე. მე ისიც არ ვიცი, ეს პირადი ნომრები როგორ უნდა გამოვიყენო, ეს არის სასაცილო. უბრალოდ, რაში სჭირდებათ, არ ვიცი. მჯერა, ხალხი თვითონ მივიდა იმ შეგნებამდე, რომ გაარჩიოს ვინ არის მართალი და ვინ მტყუანი. ასე რომ, თუ ვინმეს უნდა მაგათი არჩევა, ისედაც აირჩევს.“

სოფელ ვაჩნაძიანის ადმინისტრაციული ერთეულის სპეციალისტი, ლია გოლეთიანი მათ ბრალდებას ცილისწამებას უწოდებს: „ეს წმინდა წყლის სიცრუეა. ერთი ადამიანი მაინც მომიყვანონ, ვინც ამას დაადასტურებს. როცა სამსახურს ვიწყებდი, ვიცოდი, რისი უფლება მაქვს და რისი – არა.აქ საქმე სხვანაირად იყო, უბანში მიდიოდნენ და ხალხს ეუბნებოდნენ, „ქართული ოცნებიდან“ ვართო. რამდენიმე ადამიანმა ამის თაობაზე მკითხა და მეც სიმართლე ვუთხარი. ეტყობა, ნათია ამის გამოა გამწარებული. უბრალოდ, სირცხვილია, რომ „ქართული ოცნების“ ყოფილი აქტივისტი, ეხლა დადის და მის წინააღმდეგ მუშაობს. სოფელში იკითხეთ, როგორი ავტორიტეტი მაქვს და რის გამკეთებელი ვარ. შემიძლია, მაგათ წინააღმდეგ საჩივარი შევიტანო, მაგრამ არ ვიკადრებ,“-აღნიშნა ჩვენთან სატელეფონო საუბარში ლია გოლეთიანმა.

,,პაატა ბურჭულაძე – სახელმწიფო ხალხისთვის“ კაჭრეთის ზონის უფროსმა ხატია ბურდულაძემ, რამდენიმე თანაგუნდელთან ერთად, პარტია დატოვა და „ქართულ ოცნებას“ შეუერთდა. ,, პაატა ბურჭულაძე – სახელმწიფო ხალხისთვის“ გურჯაანის მაჟორიტარი დეპუტატობის კანდიდატის, გიორგი ხაზიურის თქმით, ხატია ბურდულაძემ წასვლის მიზეზედ მმართველი პარტიის მხრიდან ზეწოლა დაასახელა.
„ხატია ბურდულაძე ერთი თვის წინ მოვიდა ჩემთან და მითხრა, რომ „ქართული ოცნებიდან“ მასზე სერიოზული ზეწოლა იყო. მან ისიც განაცხადა, რომ რაც არ უნდა მომხდარიყო, არ გვიღალატებდა. მე მაინც მივიჩნიე, რომ ეს ადამიანი უნდა გადაგვემოწმებინა. როგორც აღმოჩნდა, მას და თავის 9 თანამზრახველს, „ქართულმა ოცნებამ“ სერიოზული თანხა გადაუხადა და მათი კანდიდატის სასარგებლოდ მუშაობდნენ. რადგან ინფორმირებული ვიყავი, 4 სექტემბერს ხატია დავიბარე და ვუთხარი, რომ ის და მისი თანამზრახველები ჩვენს გუნდში აღარ ირიცხებოდნენ. აქედან წასვლის შემდეგ, ისინი, რა თქმა უნდა, „ქართულ ოცნებაში“ მივიდნენ. ოფისში გადაწყვიტეს ჩვენთვის შავი პიარი აეგორებინათ და ბრიფინგიც იმიტომ გამართეს. მინდა გითხრათ, რომ ხატია 25 ადამიანზე ლაპარაკობდა, მაგრამ ჩვენგან მხოლოდ 9 ადამიანი წავიდა,“-აღნიშნა გიორგი ხაზიურმა.

გიორგი ხაზიურის ბრალდებებს აბსურდულს უწოდებს ხატია ბურდულაძე და ამბობს, რომ მისი ნათქვამი სიმართლეს არ შეესაბამება. „ასეთი საუბარი ჩემსა და ხაზიურს შორის არ ყოფილა. ზეწოლას არასოდეს არავინ ახორციელებდა. ის, რომ ვითომ თვითონ გამათავისუფლა, ესეც ტყუილია. რეალურად, პარტია დავტოვეთ დაახლოებით 16-მა ადამიანმა.ზოგიერთი რაღაც საუბრების შემდეგ ისევ მათთან დარჩა. ყველას თავისი არჩევანი აქვს და მე ვერ ჩავერევი. წამოსვლის შესახებ გადაწყვეტილება იმიტომ მივიღე, რომ ვერასდროს ვიქნები „ნაციონალების“ გვერდით. გარდა ამისა, მხოლოდ ჩემზეც არ იყო დამოკიდებული, რადგან ჩემს უკან სხვა ადამიანებიც იდგნენ და მათ ასე ჰაერში ვერ დავტოვებდი. თითოეულს გავესაუბრე და ერთად გადავწყვიტეთ, რომ პარტია დაგვეტოვებინა,“ -აღნიშნა მან.

როგორც გიორგი ხაზიური ამბობს, ხატიას გარდა ზეწოლა პარტიის სხვა წევრებზეც მიმდინარეობს. „ზეწოლა ხორციელდებოდა რობერტი არაყიშვილზე, რომელიც ჩვენი ზონის ხელმძღვანელი იყო ძირკოკში, ჭანდარსა და ვეჯინში. ის ძალიან წესიერი ადამიანია და ზეწოლის შესახებ არაფერი გაგვიმხილა, უბრალოდ მითხრა, რომ პარტიას ტოვებდა. პრობლემა ის არის, რომ მისი ცოლი და შვილები საჯარო სამსახურებში მუშაობენ. გარდა ზეწოლისა, „ქართული ოცნების“ მხრიდან, ამომრჩევლების მოსყიდვაც მიმდინარეობს. სოფელ ვაჩნაძიანში თებერვალში იყო გაზიფიცირების საკითხი დაგეგმილი, მაგრამ ხელისუფლებამ არ გააკეთა. ცოტა ხნის წინ, დეპუტატობის კანდიდატი სოფელში ავიდა და ხალხს დაპირდა, რომ გაზს გაიყვანდა, ერთი კვირის თავზე, მართლაც დაიწყო სამუშაოები. მე მივმართე ცესკო-ს და ჩვენს იურიდიულ სამსახურსაც, რომ ეს იყო მოსყიდვა.“

გიორგი ხაზიური, ამ ყველაფერში „ქართული ოცნების“ შტაბის წევრს გოგი მაჩხაშვილს ადანაშაულებს. „მაჩხაშვილი არის რუხი კარდინალი და გადაბირებას ის ხელმძღვანელობს. აქამდე ხმას არ ვიღებდი, მაგრამ თვითონ გამომიწვიეს. სერიოზულ ინფორმაციას ვფლობ მაჩხაშვილის მუშაობის პერიოდზე, ის კორუმპირებული პიროვნებაა.“ გიორგი ხაზიურს პასუხობს და მის ბრალდებას აბსურდულს უწოდებს „ქართული ოცნების“ საარჩევნო შტაბის წევრი გოგი მაჩხაშვილი.
„ ამ საკითხთან არანაირი შეხება არ მაქვს. ეს ჩვეულებრივი პროცესია, ვიღაც მიდის პარტიიდან, ვიღაც მოდის. ორი კაცი გადმოვა დათოსკენ(„ქართული ოცნების“ კანდიდატი) თუ ხუთი, ეს მათი გადასაწყვეტია. კორუმპირებულად მიხსენიებს და მთელმა რაიონმა იცის, ვინ ვინ არის, ხაზიურის პიროვნებაც იციან და ჩემიც. რაც შეეხება გაზიფიცირებას, ეს არის სახელმწიფო პროგრამა,რომელიც შეიძლება რაღაც მიზეზების გამო, განსაზღვრულ დროში ვერ დაიწყო. კითხვა მაქვს, რადგან არჩევნებია, არ უნდა დაწყებულიყო? მომავალ წელს თვითმმართველობის არჩევნებია, შემდეგ საპრეზიდენტო და ამიტომ ყველა საქმე გასაკეთებელი უნდა დარჩეს?! კალაურისა და კახიფარის გაზიფიცირებაც გეგმაშია, მაგრამ ჯერ არ დაწყებულა. ძნელია ასეთი ბრალდებების მოსმენა.“
მისივე თქმით, „ქართული ოცნების“ დეპუტატობის კანდიდატი, დავით სონღულაშვილი ყველა სოფელის პრობლემებით ინტერესდება და ასევე იქცევიან სხვა პარტიის წარმომადგენლებიც.

მარინა ბეროშვილი