საქართველოში კულტურული ვაზის 500-ზე მეტი ქართული ჯიშია აღწერილი. ასეთი მრავალფეროვნება კიდევ ერთხელ მიანიშნებს იმ ფაქტზე, რომ ჩვენთან მევენახეობა ათასწლეულებს ითვლის. კახეთში აქედან ძირითადად გავრცელებულია რქაწითელი, მწვანე კახური, ხიხვი, ქისი, საფერავი და ა.შ. როგორც ჩვენთან საუბარში "რთველი 2013"-ის საკოორდინაციო შტაბის ხელმძღვანელმა ლევან დავითაშვილმა აღნიშნა, კახეთში ძირითადად რქაწითელი და საფერავი დომინირებს. "ვენახების ყველაზე დიდი ფართობი საფერავსა და რქაწითელს უკავია. ასევე გავრცელებულია "მანავის მწვანე~, რომელსაც სინამდვილეში "მწვანე კახური" ჰქვია. ეს ჯიში ძირითადად საგარეჯოს, თელავისა და ახმეტის რაიონში გვხვდება. რაც შეეხება დანარჩენ სახეობებს, კახეთის რვავე რაიონში თანაბრად არის გადანაწილებული," _ გვითხრა მან. მისივე თქმით, ჩვენს რეგიონში კომპანიების მხრიდან ძირითადი მოთხოვნა, მაინც საფერავსა და რქაწითელზე მოდის. -"საფერავი წითელი ყურძნის ვაზის სახეობებიდან ყველაზე მეტად არის გავრცელებული. ის საუკეთესო ღირსების წითელ საღვინე ჯიშს მიეკუთვნება. კახეთის მიკროზონებში, როგორიცაა მუკუზანი, ახაშენი, ხაშმი, ნაფარეული, ყვარელი და სხვა, მოწეული ყურძნისგან მიღებული ღვინო დამახასიათებელ არომატს და გემოს იძენს. ამ ჯიშისგან მზადდება საუკეთესო ღვინოები: "მუკუზანი", "საფერავი", "ახაშენი", "ქინძმარაული", რომლებიც შეიძლება ქართული მეღვინეობის მარგალიტებად ჩაითვალოს. ასევე უნივერსალური თეთრი ყურძნის ჯიშია რქაწითელი. რომელიც საქართველოს დიდ ნაწილშია გავრცელებული, ძირითადად კი კახეთში. ის მშრალი, ნახევრად ტკბილი, საშამპანურე და საბრენდე ღვინომასალების მისაღებად გამოიყენება.Mმისგან მზადდება ასევე სამარკო ადგილწარმოშობის ღვინოები: "ვაზისუბანი" და "წინანდალი." ლევან დავითაშვილის განმარტებით, საბრენდედ კომპანიები დაბალფასიან შერეულ ჯიშებსაც იყენებენ. აღნიშნული ეტაპისთვის ამ დანიშნულებით დაახლოებით 5-6 ტონამდე ყურძენია გადამუშავებული. -"ბრენდი არის გამოხდილი ღვინო, რომელიც დავარგებულია და ამის შემდეგ მისგან აკეთებენ მაღალალკოჰოლურ სასმელს. ამისთვის შეიძლება გამოიყენონ ნებისმიერი ჯიშის ყურძენი. ცნობილი სამარკო დასახელების ბრენდები კი მზადდება ისეთი ჯიშის ყურძნისგან, როგორიცააა: მწვანე კახური, რქაწითელი და საფერავი, რომელიც სახელმწიფოს მიერ ჩვეულებრივ სუბსიდირდება. სამივე ჯიშს ყველა კომპანია იბარებს. რაც შეეხება წარაფს, ანდა გავრცელებულ იშვიათ ჯიშებს, რომელსაც მოსახლეობა განსაკუთრებულ სახეობად მიიჩნევს, იგივე რქაწითელია და ფასიც, შესაბამისია." რაც შეეხება ღვინის რეალიზაციას, ლევან დავითაშვილის თქმით, რუსეთისა და ევროპის ქვეყნებიდან სხვადასხვა მარკის ქართულ ღვინოებზეა მოთხოვნა. -"ყოფილ საბჭოთა კავშირის ქვეყნებში პოპულარულია მაგალითად: ქინძმარაული, ხვანჭკარა, მუკუზანი, წინანდალი. რაც შეეხება ფასს, გააჩნია ღვინოს, მათი ღირებულება საშუალოდ 2-დან 4 დოლარამდე მერყეობს." მან ასევე არაქართულ ჯიშის ყურძენზეც ისაუბრა. -"საუკენეზე მეტია, რაც საქართველოში ადგილობრივ აბორიგენულ ვაზის ჯიშებთან ერთად, უცხოური სახეობებიც გააშენეს. მაგალითად: ალიგოტე, პინო, კაბერნე სოვინიონი და სხვა, რომელიც სუბსიდირებული არ არის. ის არ გახლავთ ქართული ჯიშის, მცირედია და ამიტომ დარაიონებაში ვერ ხვდება." ლევან დავითაშვილის თქმით, რთველი ამჟამად ყველაზე ინტენსიურად საგარეჯოს რაიონში მიმდინარეობს. -"აქამდე რთველი დედოფლისწყაროს, გურჯაანის, სიღნაღისა და ყვარლის რაიონში იყო, ეხლა კი ინტენსიურად საგარეჯოში ხდება ყურძნის კრეფა, რადგან იქ ყველაზე გვიან მწიფდება. საგარეჯოსთან ერთად რთველი ახმეტაშიც დაიწყო. ღვინის კომპანიების უმრავლესობამ ყურძნის მიღება უკვე დაამთავრა, რადგან ძირითადი მარაგი აღებული აქვთ. თუმცა დაახლოებით 20-მდე ქარხანა კიდევ განაგრძობს მოსავლის მიღებას. ისინი გადანაწილებულია შემდეგ რაიონებში: სიღნაღი, გურჯაანი, ყვარელი და ახმეტა. ფაქტობრივად ინტენსიური კრეფა 10 დღეში უნდა დასრულდეს. თუმცა შეიძლება, რომელიმე კერძო მევენახემ თავისთვის რაღაც დაიტოვოს და მოგვიანებით ჩააბაროს, ამიტომ ბოლომდე მაინც ვერ განვსაზღვრავთ რთვლის დასრულების თარიღს," _ აღნიშნა მან. შტაბის ხელმძღვანელმა იმ საკითხზეც ისაუბრა, რომელიც ბოლო პერიოდში დილერებთან დაკავშირებით გავრცელდა. კერძოდ, გლეხები საუბრობენ იმის შესახებ, რომ კონკრეტული პირები მათგან იაფად შეძენილ ყურძენს ქარხნებში თავად ძვირად აბარებენ. -"ასეთი შემთხვევები მართლაც დაფიქსირდა. დილერები ცდილობენ ყურძენი იაფად იყიდონ და მომატებულ ფასში ჩააბარონ. ამიტომ მოვუწოდებ ყველა მევენახეს, თვითონ სცადოს კომპანიებთან ურთიერთობა, რომ შუამავალი აღარ დასჭირდეს.Aასეთ შემთხვევაში კომპანიაც ზარალდება და გლეხიც. ზოგადად, ეს ფაქტი იმანაც გამოიწვია, რომ ხალხში გავრცელდა ინფორმაცია, შუამავლის გარეშე მოსავალს ვერ ჩააბარებთო. ეს, რა თქმა უნდა, სიცრუეა. გლეხებს მოსავლის ჩაბარებაში ხელს არავინ უშლის. ვერ გეტყვით კონკრეტულად მიზეზი რა არის, მაგრამ ზოგს მიამიტურად სჯერა ვიღაცის, ზოგს ტრანსპორტით უზრუნველყოფას სთავაზობენ, რაზედაც ნაკლები ძალისხმევა უწევთ." მისი განმარტებით, ამ ფაქტების შესახებ მათთვის კომპანიებისგან და თვითონ ფერმერებისგან გახდა ცნობილი. თუ იქნება ასეთი შემთხვევა, მაშინ ფერმეფერები ცხელ ხაზს უნდა დაუკავშირდნენ და შტაბის თანამშრომლები დახმარებას გაუწევენ. ამავე თემაზე სწორი მენეჯმენტი – “რთველი 2013″-ის წარმატების გარანტი[R] “რთველი 2013″-გარდამავალი ეტაპი მეღვინეობის დარგში [R] ჭარბი ყურძნის მიღება-გადამუშავება რუსეთის ბაზრის გახსნამ გამოიწვია [R] მინისტრის თქმით, ბაზარზე მთავარი მოთამაშე კერძო სექტორია [R]