"რთველი-2013"-ის დასრულებამდე რამდენიმე კვირა დარჩა. "სპექტრთან" საუბრისას მიმდინარე პროცესი სოფლის მეურნეობის მინისტრმა შალვა ფიფიამ შეაფასა. მისი განცხადებით, სამინისტრო ყველაფერს აკეთებს იმისთვის, რომ 2013 წლის შემოდგომა განსაკუთრებით შემოსავლიანი იყოს კახელი გლეხისა თუ მეწარმისათვის. შალვა ფიფიამ "სპექტრთან" აქცენტები იმ საკითხებზე გააკეთა, რაც "რთველი 2013"-ს გასული წლების ამ სეზონისგან განასხვავებს.მან მეწარმის დასახმარებლად ამუშავებულ შეღავათიან აგროკრედიტზე და სუბსიდიის შეცვლილ მექანიზმზე მიანიშნა. -"კახეთის ყველა რაიონში, საგარეჯოს გარდა, აქტიურად მიმდინარეობს რთველი. წელს პრინციპულად შეიცვალა მიდგომები. რამდენიმე ძირითადი განსხვავებაა: ერთი ის, რომ შევქმენით სპეციალური საკრედიტო პროდუქტი ღვინის კომპანიებისთვის. მათთვის, ყურძნის საყიდლად შეღავათიანი კრედიტი ხელმისაწვდომი გახდა. ასევე შეიცვალა სუბსიდირების სქემა. წელს სუბსიდია პირდაპირი წესით ხდება _ რქაწითელზე, საფერავსა და მწვანე კახურზე და არა ვაუჩერების გზით." რთვლის პროცესში სახელმწიფოს ჩართულობის მინიმუმამდე დაყვანას მინისტრი კიდევ ერთ მიღწევად მიიჩნევს. -"წინა წლებში სახელმწიფოს მხრიდან საკმაოდ უხეში ჩარევის მაგალითები გვქონდა. ყურძნის ძირითადი შემსყიდველი სახელმწიფო ქარხნები იყვნენ. ინდუსტრიული მოსავლის დაახლოებით 64% სახელმწიფო კომპანიებმა ჩაიბარეს. უხეშადUჩაერივნენ და ბაზარზე დააწესეს ფასები. წელს კი ძირითადი მოთამაშე კერძო სექტორია." შალვა ფიფია აცხადებს, რომ წინა ხელისუფლების პირობებში კომპანიები ყურძნის მიღებას არაკონდიციურ ფაზაში იწყებდნენ. -"სამწუხაროდ, წინა წლებში გვქონდა პრაქტიკა, რომ რთველი ყურძნის ტექნიკური სიმწიფის მიღწევამდე იწყებოდა. უმწიფარი ყურძენი ოდნავ უფრო მძიმეა, ვიდრე მწიფე, კონდიციური. საბოლოო პროდუქტი არ იყო ხარისხიანი. წელს ჩაბარება კონდიციური სიმწიფის შემდეგ ხდება." "სპექტრთან" საუბრისას მინისტრმა ასევე განმარტა, რატომ გახდა წელს სუბსიდიის პროგრამის გამოყენება საჭირო, მაშინ, როდესაც ახალი მთავრობა აღნიშნული პროგრამის გაუქმების საკითხს განიხილავდა. შალვა ფიფიას თქმით, არსებული კურსის შენარჩუნების შემთხვევაში, შესაძლოა, სუბსიდია მომავალი კვირიდან აღარ იყოს საჭირო. -"ჩვენთვის გარდამავალი წელია, ძალიან დიდი მოსავალია. დაახლოებით 140-150 000 ტონაზეა საუბარი. შესაბამისად, დავტოვეთ სუბსიდიის მექანიზმი, იმისთვის, რომ მხარი დავუჭიროთ ჩვენს მევენახეებს, მეღვინეებს, რათა ეს სექტორი ფეხზე დადგეს. თუმცაღა, თუ ეს ტენდენცია შევინარჩუნეთ _ ასეთი მზარდი მოთხოვნა _ შესაძლებელია, მომავალ წელს სუბსიდია აღარ იყოს." სოფლის-მეურნეობის მინისტრი აცხადებს, რომ ამ დროისთვის კახეთში 60-ზე მეტი საწარმო იბარებს ყურძენს. "ბოლო ექვსი დღის განმავლობაში კახეთის მასშტაბით დღე-ღამეში ქარხნები 4 000 ტონამდე ყურძენს მიიღებენ. ეს ძალიან მაღალი რიცხვია. შემიძლია გითხრათ, რომ გასული 15-20 წლის მანძილზე ჩაბარების ასეთი მაჩვენებელი არ ყოფილა,~ _ გვითხრა მან და აქვე დასძინა: `ქართულ ღვინოზე მოთხოვნა მნიშვნელოვნად არის გაზრდილი. ექსპორტი 43%-ია, აქედან ნახევარი რუსეთის ბაზრის გახსნის შედეგია." მინისტრის თქმით, შეიცვალა სამინისტროს მიდგომა და მევენახეების დიფერენცირება აღარ ხდება. "ძალიან მნიშვნელოვანია ე.წ "ფაშისტების" თემა. წინა ხელისუფლების დროს, სამწუხაროდ, მსხვილი მევენახეების ყურძნის მიღება ხშირ შემთხვევაში არ ხდებოდა. წელს ასე აღარ არის. არანაირი პრინციპული განსხვავება არაა 7, 5, თუ 10 ჰექტრის მფლობელ მევენახეს შორის. ყველა მათგანს ქარხანაში ყურძნის ჩაბარების შესაძლებლობა ერთნაირად აქვს." შალვა ფიფია ამბობს, რომ მოსავლის მაღალი ხარისხი პირდაპირ კავშირშია სამინისტროს მიერ გახნორციელუბულ იმ პროგრამასთან, რომელიც გაზაფხულზე დაიწყო. "წელს უპრეცედენტო მასშტაბის საგაზაფხულო პროგრამა ჩატარდა. ფერმერებს, მევენახეებს შესაძლებლობა ჰქონდათ მიეღოთ მცენარეთა დაცვის საშუალებები. ასევე, სამ მილიონზე მეტი ნერგია წელს გაყიდული. ეს ნიშნავს დამატებით ათასი ჰექტარის გაშენებას. ყველაფერს ვაკეთებთ იმისთვის, რომ ინდუსტრია ფეხზე დადგეს." სოფლის მეურნეობის მინისტრი პირობას დებს, რომ ქართული ღვინო გახდება საინტერესო პროდუქტი მსოფლიო ბაზარზე, მევენახეს კი ექნება საშუალება მიიღოს ღირსეული შემოსავალი.