ადგილობრივი თვითმმართველობის არჩევნები დასრულდა. კოალიცია "ქართულ ოცნებასთან" ის მაჟორიტარი კანდიდატებიც კი დამარცხდნენ, რომლებსაც თვითმმართველობაში მუშაობის მრავალწლიანი გამოცდილება გააჩნიათ. როგორ აფასებენ გამარჯვებული და დამარცხებული კანდიდატები არჩევნების შედეგებს, ვინ მოიაზრება საკრებულოს თავმჯდომარედ და რამდენად დიდია მათი ამბიცია _ "სპექტრი" ამ საკითხებზე 2014 წლის მოწვევის საკრებულოს რამდენიმე კანდიდატს ესაუბრა. გურჯაანის მაჟორიტარ დეპუტატად სხვა კანდიდატებთან ერთად კენჭს იყრიდნენ მმართველი პარტიის წარმომადგენელი ზვიად ყვირალაშვილი და კოალიცია "ნინო ბურჯანაძე-ერთიანი ოპოზიციიდან" საკრებულოს თავმჯდომარის ყოფილი მოადგილე, ალექსანდრე სირბილაშვილი. როგორც ჩვენთან საუბარში ზვიად ყვირალაშვილმა აღნიშნა, არჩევნებმა გაყალბების გარეშე ჩაიარა და იმაშიც დარწმუნებული იყო, რომ გაიმარჯვებდა. -"მე ვერ ვიტყვი, რომ არსებულმა ხელისუფლებამ შექმნა ილუზია, რომ ყველგან მმართველმა გუნდმა უნდა გაიმარჯვოს. ჩვენ ხალხს მივანდეთ რეალური არჩევანის საშუალება და მათაც აირჩიეს არა ერთი, არამედ რამდენიმე პარტიის და საინიციატივო ჯგუფის წარმომადგენლები. კმაყოფილი ვარ, რომ მოსახლეობამ ნდობა გამომიცხადა. თუმცა არ ვფიქრობ, რომ აუცილებელია 100%-იანი გამარჯვების მიღება. 2006 წლიდან 2009 წლამდე საკრებულოს დეპუტატი პარტიული სიით ვიყავი და ფრაქცია `რესპუბლიკელებს~ ვხელმძღვანელობდი. მიუხედავად ჩემი დიდი მეცადინეობისა, 2010 წელს უკვე ვეღარ მოვხვდი საკრებულოში, ამიტომ ვთვლი, რომ ეხლა მქონდა რევანშის საფუძველი. ამ დღეს დიდი ხნის განმავლობაში ველოდი. ჩემთვის ყველაზე მნიშვნელოვანი ხალხის ნდობა იყო. დეპუტატობა არ არის იმდენად მომხიბვლელი, რამდენადაც ხალხის მიერ ბოძებული მანდატი," _ აღნიშნა მან. ალექსანდრე სირბილაშვილი ამბობს, რომ ეს იყო განსაკუთრებული არჩევნები თავისი ხარვეზებით და უარყოფითი მომენტებით. -"ხდებოდა უპრეცედენტო ადმინისტრაციული რესურსების გამოყენება და ეს თვალშისაცემი იყო. ყველაფერი რომ კანონის ფარგლებში ჩატარებულიყო, ჩვენი პარტია 20%-ს თავისუფლად გადალახავდა. მაინც დიდი მადლობა გურჯაანელებს, რომ დათრგუნეს ძველი ხელისუფლების დროინდელი გამოყოლილი შიში და საკმარისი ხმები დავაგროვეთ. მე დარწმუნებული ვარ, სხვა შემთხვევაში აუცილებლად გავიმარჯვებდი. ვფიქრობ, მოვა ის დრო, როცა მოსახლეობა ისევ დამიდგება გვერდში," _ ამბობს ალექსანდრე სირბილაშვილი. მისივე თქმით, მაჟორიტარ კანდიდატად კენჭისყრა ბოლო მომენტში გადაწყვიტა. -"`საუბარი იყო და გაჟონა კიდეც ინფორმაციამ, რომ ბატონი გია გერგიძე აპირებდა ჩვენი პარტიის მაჟორიტარი კანდიდატი ყოფილიყო, მაგრამ მან ბოლო მომენტში უარი განაცხადა და აქედან გამომდინარე, ისევ მე ავიღე ეს ტვირთი. ვაღიარებ, რომ არ მქონია ცუდი დამოკიდებულება არსებულ ხელისუფლებასთან. პირიქით, ძალიან სერიოზული შემოთავაზებებიც მქონდა მათი მხრიდან, მაგრამ გარკვეულმა გარემოებებმა მაფიქრებინა, რომ ამ ხელისუფლებას მნიშვნელოვანი ლაფსუსები აქვს. სწორედ ამიტომ გადაიხარა ჩემი პოლიტიკური მრწამსი სხვა პარტიისკენ." ალექსანდრე სირბილაშვილის განმარტებით, ზოგიერთი პოლიტიკოსის დიდი მცდელობის მიუხედავად, რომ ჩამოაშორონ დღევანდელ საქმიანობას, პოზიციების დათმობას არ აპირებს. -"ჩვენ საკმარისი ხმები გვაქვს იმისთვის, რომ ახალ საკრებულოში ფრაქცია შევქმნათ და მიზნის მისაღწევად საქმიანობა გავაგრძელოთ. არავის მივცემთ უფლებას ხალხის მიერ შეგროვილი ბიუჯეტის თანხები არამიზნობრივად გამოიყენოს, მოხმარდეს ვიღაც-ვიღაცების კაპრიზებს და პირად ინტერესებს. გადავხედე პოლიტიკური პარტიების სიებს და რამდენიმე გამონაკლისის გარდა, ძალიან ცოტაა იქ პროფესიონალი. ვინმეს თუ ჰგონია, რომ ახალი სახეები პოლიტიკაში რამეს ქმნიან, ძალიან ცდება. როგორც ვატყობ, ამ ხელისუფლებას გამოცდილი, გონიერი და პატიოსანი კადრები არ სჭირდება. თუ რატომ, ამის განსჯა მკითხველისთვის მიმინდვია. მე მგონი, ნორმალური პოლიტიკოსის ადგილი არ არის იმ ხელისუფლებაში, რომელიც ცდილობს ვერტიკალში შეინარჩუნოს ძალაუფლება და არ გადასცეს ხალხს თვითმმართველობა." გარკვეულ დარღვევებზე საუბრობს საკრებულოს ყოფილი თავმჯდომარე "ნაციონალური მოძრაობის" წევრი ზაქარია იაგანაშვილიც, რომელიც სოფელ გურჯაანში მაჟორიტარად იყრიდა კენჭს. -"ზოგიერთ უბანზე ისე არ იყო ყველაფერი, როგორც კანონი ითვალისწინებს. არის ეჭვის საფუძვლები, მაგრამ ამას ხმამაღლა ვერ ვამბობ და ვერ დავამტკიცებ, რადგან დოკუმენტაცია არ არსებობს. ეს, ალბათ, პარტიების წარმომადგენლების უნიათობის თუ სხვა გარემოების ბრალია. "ქართული ოცნების" ყველა კანდიდატს გარკვეული ფორა ჰქონდა. ამჯერად სოფლის გამარჯვებულმა დეპუტატმა და მეც ერთად უნდა გავაგრძელოთ საქმის კეთება." ახალი საკრებულო სულ ცოტა ხანში შეუდგება მუშაობას. გავრცელებული ინფორმაციით, თავმჯდომარის პოსტზე კოალიციიდან რამდენიმე კანდიდატი მოიაზრება. მათ შორისაა, გურჯაანის მაჟორიტარი დეპუტატი ზვიად ყვირალაშვილი და კაჭრეთის მაჟორიტარი, მოქმედი გამგებელი ემზარ ჯიქურაშვილი. როგორც ჩვენთან საუბარში ემზარ ჯიქურაშვილმა განმარტა, ის გამარჯვებაში 100%-ით იყო დარწმუნებული. -"არჩევნებში რომ გავიმარჯვებდი, ეჭვიც არ მეპარებოდა. არგუმენტად იმის მოყვანაც შეიძლება, რომ არც მიფიქრია ჩემი თავი პარალელურად სიაშიც ჩაესვათ, რაც კანდიდატებს გარკვეულწილად აზღვევს. ვიცოდი რა ურთიერთობა მქონდა ხალხთან და მათი მხარდაჭერის იმედი მქონდა. მაჟორიტარად ჩემი კანდიდატურა რომ გადაწყდა, არჩევნებამდე თვენახევარიღა იყო დარჩენილი. როდესაც სოფელში ადგილზე გავეცანი სიტუაციას, ვნახე, რომ კომისიაში მყოფი "ქართული ოცნების" წარმომადგენლებიც, ზოგიერთ შემთხვევაში, ღიად გამოხატავდნენ კონკურენტის მიმართ მხარდაჭერას. სწორედ ამან გამოიწვია, რომ დიდი პროცენტით ვერ მოხდა ჩემი გამარჯვება. ხმები, რომელიც ჩემმა მოწინააღმდეგემ აიღო, იყო მისი მხრიდან 10 თვის განმავლობაში დაშვებული თუ დაუშვებელი მეთოდებით მიღებული შედეგი." ჯიქურაშვილის თქმით, ზვიად ყვირალაშვილთან ძალიან კარგი ურთიერთობა აქვს და მათ შორის განხეთქილება არ არის მოსალოდნელი. -"კოალიციასთან და შტაბთან იქნება კონსულტაციები. დიდი ალბათობით დარწმუნებული ვარ, რომ მიღებული იქნება ის გადაწყვეტილება, რაც უფრო მეტად წაადგება რაიონს. ძალიან მრავალფეროვანი საკრებულო მივიღეთ, საკმაოდ რთული იქნება მუშაობა, მაგრამ თუ ყველა გამოვალთ იმ პრინციპიდან, რომ რაიონის სასიკეთოდ ვიმოქმედოთ, მოვახერხებთ შეჯერებას და გადაწყვეტილების მიღებას." როგორც ზვიად ყვირალაშვილმა განაცხადა, მას საკრებულოს თავმჯდომარეობაზე სერიოზული ამბიცია გააჩნია. -"ვფიქრობ, მაქვს გონივრული საფუძველი, რომ მქონდეს საკრებულოს თავმჯდომარეობის ამბიცია. ეს ყველაფერი იქნება განხილული. მარტო ჩვენ არ მოვიაზრებით კოალიციიდან, აქ არიან სხვა პოლიტიკური სუბიექტებიც. ამას დადებითად ვუყურებ, რადგან უკეთესი კანდიდატურა ყოველთვის კონკურენციის საფუძველზე ვლინდება. კოალიციაში ნებისმიერი დონის გახლეჩვას გამოვრიცხავ, რადგან ისეთ კანდიდატურას წარადგენენ, რომელსაც ყველა მხარს დაუჭერს. მე ვარ პოლიტიკური ჯარისკაცი და ჩემი ხალხისთვის სადაც საჭირო ვიქნები, იქ წავალ." ვინ გახდება საკრებულოს თავმჯდომარე, ჯერჯერობით უცნობია. ფაქტი ისაა, რომ მმართველი გუნდი საკრებულოში უმრავლესობითაა წარმოდგენილი და 25 წევრს ითვლის.