გურჯაანის თვითმმართველობაში საკონკურსო-საატესტაციო კომისიის მიერ გასაუბრებაზე დაწუნებული კანდიდატები კონკურსის შედეგებს აპროტესტებენ. როგორც ჩვენთან საუბარში ერთ-ერთი კონკურსანტი ამბობს, საშუალება არ მისცეს თავისი შესაძლებლობა ბოლომდე გამოევლინა. ტარიელ ორველაშვილმა და მისმა მეუღლე თინათინ ორველაშვილმა, ტესტირების შედეგად 43 და 40 ქულა დააგროვეს. თუმცა გასაუბრების შედეგად მათი კანდიდატურები არ შეირჩა. უკმაყოფილო ტარიელ ორველაშვილი საკონკურსო-საატესტაციო კომისიის მიზანმიმართულ ქმედებაზე საუბრობს და ამბობს, რომ ის შეგნებულად დაბლოკეს. „ტესტირებაზე 43 ქულა ავიღე. ეს სრულიად საკმარისი იყო გასაუბრების ეტაპზე გადავსულიყავი. გასაუბრებაზე რომ შევედი, თავი დაკითხვაზე მეგონა, რადგან მსჯავრდებულივით შუაში ვიჯექი და აქეთ- იქიდან შეკითხვებს მაძლევდნენ. პირველი შეკითხვა ინფრასტრუქტურის შესახებ დამისვევს, ვინაიდან ერთი განაცხადი სწორედ შესაბამის სამსახურზე მქონდა შეტანილი. გამგებელს ეჭვი შეეპარა ჩემს კომპეტენტურობაში, რაც შეურაცხმყოფელი იყო. განაცხადები ასევე შევიტანე კულტურის სამსახურის და სამხედრო აღრიცხვის სამსახურის ვაკანტურ ადგილებზე, თუმცა შეკითხვები საჯარო სამსახურთან დაკავშირებით დამისვეს. კონკრეტული მიმართულებით ხედვის წარმოდგენის საშუალება არ მომცეს, რამაც ეჭვი გამიჩინა, რომ ჩემი სამსახურში აყვანა თავიდანვე არ აინტერესებდათ“. ტარიელ ორველაშვილი განმარტავს, რომ მის მიმართ კომისიის ნეგატიური განწყობა, გამგებლის წარმომადგენლის ქალაქ გურჯაანში დიმა არევაძის გავლენით იყო გამოწვეული. „კონკურსის გამოცხადებამდე დიმა არევაძესთან ხელშეკრულებით სპეციალისტად ვმუშაობდი. სექტემბრიდან მოყოლებული 4-5-ჯერ დაგვასუფთავებინეს ქალაქი, არ გვქონდა შესაბამისი ინვენტარი და იძულებული ვიყავით ხელთათმანის გარეშე აგვეკრიფა ნაგავი. ახლახანს თოვლი რომ იყო, დიმამ გვიან ღამით დამირეკა და მითხრა, დილის 9 საათზე „ლაფატკით“ ხელში გამოცხადდიო. უქმე დღე იყო და ავადმყოფი დის მონახულებას ვაპირებდი, ამიტომ ვუპასუხე, რომ მისვლას ვერ შევძლებდი. თუმცა მან ოფიციალური ტონით იგივე გამიმეორა. დილით გამგეობის წინ მოთხოვნისამებრ გამოვცხადდი. გამგებელი გია გერგიძე მოვიდა და მითხრა: თუ სამსახური არ მოგწონს, შეგიძლია წახვიდე და სხვა მოძებნოო. რატომ ლაპარაკობ, რომ მენაგვეებად გვაქციესო. დარწმუნებული ვარ, გამგებელმა სწორედ ამ პრეტენზიების გამო მიიღო უარყოფითი გადაწყვეტილება ჩემს მიმართ.“ ტარიელ ორველაშვილი ამბობს, რომ საკონკურსო-საატესტაციო კომისიას გამგებელი არ უნდა ხელმძღვენელობდეს და არც მისი წევრები უნდა იყვნენ გამგეობის წარმომადგენლები, რადგან ისინი კონკურსანტების შერჩევისას სუბიექტურები არიან. „კომისიის წევრი, შესაძლოა, საკრებულოდან ერთი ან ორი კაცი ყოფილიყო, მაგრამ გამგეობიდან არც ერთი. უპრიანი იქნებოდა, თუ კომისიის წევრებად არასამთავრობოების, ან სხვა კომპეტენტური დამოუკიდებელი სამსახურების წარმომადგენლები დაიშნებოდნენ“. გამგებლის წარმომადგენელი ქალაქ გურჯაანში დიმა არევაძე ადასტურებს, რომ აღნიშნული პიროვნება მასთან მუშაობდა. თუმცა აღნიშნავს, რომ დაპირისპირებას ან უთანხმოებას ადგილი არ ჰქონია. „მე არ ვიცი რას გულისხმობს ბატონი ტარიელი, მაგრამ სამსახურში დანიშვნა-არ დანიშვნის შესახებ გადაწყვეტილებას მე არ ვიღებ. შეიძლება თანამშრომელი მომწონდეს ან არ მომწონდეს, მაგრამ ეგ იმის საბაბი ვერ იქნება, რომ კაცს სამსახურზე უარი ვუთხრა“. ტარიელ ორველაშვილის გარდა, კონკურსის შედეგებით უკმაყოფილოები არიან სხვა პრეტენდენტებიც. ისინი მიიჩნევენ, რომ საკონკურსო-საატესტაციო კომისიამ უსამართლო გადაწყვეტილება მიიღო.