თელავში, ქეთევან წამებულის ქუჩაზე არსებული ხევის რეაბილიტაციას უკვე კარგად ნაცნობი საგზაო-სარემონტო კომპანია "სერპანტინი" ახორციელებს. პროექტით გათვალისწინებულია: ქეთევენ წამებულის და სააკაძის ქუჩის მონაკვეთზე მარჯვენა და მარცხენა სანაპიროების რეკონსტრუქცია-კეთილმოწყობა, იორდანეს წყაროს რეაბილიტაცია და ორი ახალი საფეხმავლო თაღოვანი ხიდის მოწყობა. 810 მეტრი სიგრძის მონაკვეთის კალაპოტს ჩაუტარდება სრული რეაბილიტაცია დაწყებული ჭავჭავაძის გამზირიდან ბახტრიონის და გოგებაშვილის ქუჩის გადაკვეთმდე. კერძოდ: ხევის ფსკერი დაიფარება რკინაბეტონით, რესტავრაცია ცაუტარდბა გვერდულებს და კედლებს. მოაჯირები მოწყობა ხევის ორივე მხარეს. გათვალისწინებულია თელავის ხევის კალაპოტში არსებული საინჟინრო კომუნიკაციების, მილსადენების ძვველი ასფალტის საფარის და ბორდიურების დემონტაჟიც. პროექტის ფარგლებში იგეგმება ავტომატური მორწყვის სისტემის მოწყობა, ტერიტორიის გამწვანება, გარე განათების მოწყობა და მოსასვენებელი ადგილების შექმნა. პროექტი 1 108 915 ლარით ფინასდება, სამუშაობის დასარულებლად ტენდერში გამარჯვებულ კომპანია "სერპანტინს" 5 თვიანი ვადა აქვს. აღსანიშნავია, რომ კახეთში "სერპანტინი" მსგავს ტენდერებს ხშირად იგებს. როგორც პარტია "ნაციონალურ მოძრაობაში" გასულ წელს ამბობდნენ, გზების დაგებასთან დაკავშირებით გამოცხადებებული ტენდერების უმეტესობა პრემიერ მინისტრ ირაკლი ღარიბაშვილის სიმამრის თამაზაშვილის ოჯახის წევრების და ახლობლების კომპანიამ მოიგო. პარტიის წევრებისთვის გაუგებარია რატომ გაიმარჯვა ტენდერებში ამ კომპანიამ, როდესაც მათ შესაბამისი ინფრასტრუქტურა არ გააჩნიათ. "თქვენ იცით, რომ ბატონი ზვიად ჯანყარაშვილი არის თამაზაშვილის დის შვილი, პრემიერის მეუღლის მამიდაშვილი. მისი კიდევ ერთი მამიდაშვილი იოსებ ქადაგიშვილი წარმოდგენილია გზების დეპარტამენტში. ის არის სატენდერო კომისიის თავმჯდომარე და ცხადია მას ეთქმის გადამწყვეტი სიტყვა როგორ განაწილდეს ეს ტენდერები. ალბათ არავის არ გაგიკვირდებათ, რომ ძალიან ხშირად ბატონი იოსებ ქადაგიშვილი გადაწყვეტილებებს იღებს შპს "სერპანტინის" სასარგებლოდ", - განაცხადა "ნაციონალური მოძრაობის" წევრმა ირმა ნადირაშვილმა. მათივე ინფორმაციით, ერთი წლის განმავლობაში, საგზაო მშენებლობაში გამოცხადებულ ტენდერებში უკვე 9-ჯერ გაიმარჯვა შპს "სერპანტინმა" (ჯამური ღირებულება 15 000 000 ლარი), მათ შორის 12 500 000 ლარის ტენდერი, სწორედ ინფრასტრუქტურის სამინისტროსა და მისი დაქვემდებარებული ორგანიზაციის მიერ გამოცხადდა. ნაციონალური მოძრაობის საპასუხოდ განცხადება გაავრცელა კომპანია "სერპანტინმა", სადაც ის ყველანაირ კორუფციულ სქემას უარყობს. როგორც "სერპანტინში" აღნიშნავენ ეს კომპანია ბიუჯეტთან მიმართებაში კეთილსინდისიერი გადამხდელია და თამაზ თამაზაშვილთან ან მის ოჯახთან არანაირი კავშირი არ აქვს. შპს "სერპანტინი", ჯერ კიდევ საბჭოთა კავშირის დროს შეიქმნა, რომელიც ხიდების სარემონტო-სამშენებლო №9 სამმართველოს მემკვიდრეა. ეს სამმართველო 1957 წელს დაარსდა, ხელმძღვანელი კი ალექსი სეხნიაშვილი იყო. სამმართველო, სხვადასხვა ტიპის სამუშაოებს საქართველოს მასშტაბით ასრულებდა. აშენებდა ხიდებს აფხაზეთში, აჭარაში, გურიაში, სამეგრელოში, რაჭაში, ქართლსა და კახეთში. მაშინდელი გეგმების მიხედვით, №9 სამმართველოს წლიური გეგმა 4 000 000-5 000 000 მანეთი იყო. 1986 წელს, №9 სამმართველოს ხელმძღვანელად გივი ზედელაშვილი დაინიშნა, რომელიც სიცოცხლის ბოლომდე, 2000 წლამდე მუშაობდა. სამმართველომ სომხეთში და საჩხერე-ჭიათურაში მიწისძვრის შედეგად დაზიანებული გზების, ასევე სვანეთში, წყალდიდობის შედეგად დანგრეული გზებისა და ხიდების აღდგენითი სამუშაოები შეასრულა. 90-იანი წლების ბოლოდან, თითქმის 100%-ით შეწყდა სახელმწიფო დაფინანსება და ასეთი სამმართველოები, ფაქტობრივად, უფუნქციოდ დარჩა. მაშინდელმა მთავრობამ, ამ ტიპის საწარმოების პრივატიზების შესახებ გადაწყვეტილება მიიღო და ყველა საგზაო სამმართველო, საპრივატიზებო ობიექტების ნუსხაში შეიყვანა. 2000 წელს, #9 სამმართველოს თანამშრომლებმა, ორგანიზაცია სახელმწიფოსგან აუქციონის წესით გამოისყიდეს. წილები კი ასე გადანაწილდა: თამარ ჯანყარაშვილი (გარდაცვლილი გივი ზედელაშვილის მეუღლე) _ 51%, ელდარ ხუცაიძე _ 31%, ტარიელ ამირანაშვილი _ 13%, ბადური შიუკაშვილი _ 5%. თელავის რაიონული სასამართლოს მიერ, 2000 წლის 19 მაისის #34/4-266 დადგენილებით, სასამართლო რეგისტრაციაში გატარდა შპს "თელავის #9 საგზაო სამშენებლო-სარემონტო სამმართველო", რომელიც 2004 წლის 12 თებერვალს, სამეწარმეო რეესტრში დარეგისტრირდა, როგორც შპს საგზაო სამშენებლო-სარემონტო კომპანია "სერპანტინი". 2004 წლიდან, განსაკუთრებული ყურადღება გამახვილდა ინფრასტრუქტურული პროექტების განხორციელებაზე, რაშიც კომპანია "სერპანტინიც" აქტიურად ჩაება. კომპანიამ მატერიალურ-ტექნიკური ბაზა თანდათან გადაახალისა და საწარმოს სიმძლავრეებიც გაზარდა. 2007-2013 წლებში, შპს "სერპანტინის" ფინანსური ბრუნვა (დღგ-ს ჩათვლით) ასეთია: 2007 წელს _ 5 322 673 ლარი, 2008 წელს _ 4 924 183 ლარი, 2009 წელს _ 12 788 286 ლარი, 2010 წელს _ 15 928 580 ლარი, 2011 წელს _ 8 087 586 ლარი, 2012 წელს _ 14 694 168 ლარი და 2013 წელს _ 14 136 201 ლარი.