დღევანდელ საკრებულოს სხდომაზე დეპუტატების ხმის უმრავლესობით მუნიციპალიტეტის გამგებლისა და საკრებულოს თავმჯდომარისთვის საახალწლო პრემიების გაცემის საკითხი დადებითად გადაწყდა. პრემიებს მიიღებენ თვითმმართველობაში დასაქმებული სხვა საჯარო პირებიც. რამდენიმე დღის წინ საკრებულომ მიიღო გადაწყვეტილება, რომ გურჯაანი ახალ წელს მოკრძალებულად აღნიშნავს. დღემდე უცნობია სად გადანაწილდა 18 ათასი ლარი, რომელიც ამ ღონისძიებისთვის იყო განსაზღვრული. დეპუტატები ამ გადაწყვეტილების მიზეზად იმ გარემოებას ასახელებდნენ, რომ მუნიციპალიტეტში უამრავი სოციალურად დაუცველი ოჯახია. პროდიუსერის ბექა ხალათაშვილის თქმით ეს თანხა კულტურული ღონისძიებებისთვის იყო განსაზღვრული და სხვა კუთხით არ უნდა გახარჯულიყო. "თქვენი მედიასაშუალებიდან გავიგე, რომ 18 ათასი ლარი კულტურულ ღონისძიებებზე იყო გამოყოფილი. როგორც ორგანიზატორი და პროდიუსერი დავინტერესდი, თუ რა ტიპის ღონისძიება უნდოდა რაიონს საახალწლოდ. გავარკვიე, რომ ტენდერი უნდა გამოცხადებულიყო და ვიფიქრე მეც მიმეღო მონაწილეობა. შემდეგ როგორც აღმოჩნდა, საკრებულოს წევრებმა, რატომღაც გადაწყვიტეს, რომ ღონისძიება არ უნდა ჩატარდეს და თანხა, რაც წლის განმავლობაში კულტურის განყოფილებამ დაზოგა, სოციალურად დაუცველებს გაუნაწილდეთ. მინდა აღვნიშნო ხაზგასმით, თვითმმართველობის პრიორიტეტი უნდა იყოს სოციალური სფერო, მაგრამ ეს თანხა კულტურას ეკუთვნოდა. განყოფილება არ ითხოვდა ბიუჯეტიდან ახალი თანხის გამოყოფას. ამჟამად ახალი წლისთვის მხოლოდ ადგილობრივი შემსრულებლების კონცერტი იგეგმება. მართალია ძალიან ნიჭიერი ხალხი გვყავს რაიონში, მაგრამ როდესაც საახალწლო კონცერტს აკეთებ, აუცილებლად უნდა გყავდეს მოწვეული სტუმარი. ასევე ხაზი მინდა გავუსვა იმას, რომ ახალი წლის ღონისძიება ღია ცის ქვეშ უნდა გაკეთდეს."-აღნიშნა მან. მისივე თქმით, კულუარებში ვრცელდებოდა კომენტარები, რა დროს კონცერტია, როცა ამდენი სოციალურად დაუცველი გვყავსო. " როდესაც ტენდერს ჩააგდებ და კულტურის კუთვნილ თანხას გადაანაწილებ, ოღონდ სად კაცმა არ იცის, და შენ იღებ კანონს, რომ პრემიები უნდა გაიცეს საახალწლოდ, რატომღაც იმ პატივცემულ კონკრეტულ დეპუტატებს დაავიწყდათ წინა დღეებში თავიანთი ნათქვამი სიტყვები, რომ თურმე გაჭირვებული ხალხი არსებობს რაიონში და მათ უნდათ მიხედვა. მე ვფიქრობ, რომ თუ კარგი მენეჯერი ხარ მაშინ, სოციალურად დაუცველებისთვის არანაკლებ დიდი ბიუჯეტი უნდა გქონდეს. ზოგიერთმა დეპუტმა არასერიოზული განცხადებები არ უნდა გააკეთოს. ამ შემთხვევაში ცოტა არაპროფესიონალიზმთან გვაქვს საქმე და პროფესიონალებს უნდა ჰკითხონ აზრი. როცა საკრებულოს წევრი ხარ ცოტა მეტი მოგეთხოვება, ვიდრე ჩვეულებრივ მოქალაქეს და უსუსური არგუმენტები არ უნდა მოგყავდეს.ჩემზე არ არის საუბარი, კონკრეტული კონცერტი შეიძლება მე არ გამეკეთებინა და სხვას მოეგო ტენდერი. აქ ცუდი ისაა, რომ ახალგაზრდებისთვის არაფერი კეთდება." გურჯაანის მუნიციპალიტეტის გამგეობის საფინანსო-საბიუჯეტო სამსახურის ხელმძღვანელი ნატო გონგაძე, პრემიების გაცემაში უჩვეულოს ვერაფერს ხედავს. მისი განმარტებით თვითმმართველობაში დასაქმებული პირები საახალწლო პრემიებს ყოველწლიურად იღებდნენ და გამონაკლისი არც ეს წელი იქნება. ამისთვის ბიუჯეტში 181 ათასი ლარია განსაზღვრული და თითოეული თანამშრომელი პრემიის სახით ერთი თვის ხელფასის შესაბამის თანხას მიიღებს.