ომბუდსმენის აპარატი ახორციელებს ადგილობრივი თვითმმართველობის ორგანოებიდან თანამშრომელთა მასობრივი გათავისუფლების, რეორგანიზაციებისა და ატესტაციის საკითხის კანონიერების შესწავლას. საქართველოს სახალხო დამცველის უჩა ნანუაშვილის ცნობით, საკმაოდ მაღალია რეორგანიზაციის/ლიკვიდაციის შედეგად მუნიციპალიტეტებიდან გათავისუფლებულ მოხელეთა რაოდენობა. 2014 წლის აგვისტოს მდგომარეობით რეგიონებში სამსახურიდან სულ 881 საჯარო მოხელე გათავისუფლდა, აქედან კახეთში - 57, კერძოდ: ახმეტის მუნიციპალიტეტის გამგეობიდან – 7 მოხელე; საგარეჯოს მუნიციპალიტეტის გამგეობიდან – 1 ; ყვარლის მუნიციპალიტეტის გამგეობიდან– 44 და გურჯაანის მუნიციპალიტეტის გამგეობიდან – 5 საჯარო მოხელე. აღსანიშნავია, რომ ზოგიერთ მუნიციპალიტეტში რეორგანიზაცია ჯერ არ დასრულებულა, ხოლო ზოგიერთიდან კი რეორგანიზაციის თაობაზე აპარატში ინფორმაცია სრულად არ არის შესული. საქართველოს სახალხო დამცველი აღნიშნული საკითხის შესწავლას აგრძელებს. საქართველოს სახალხო დამცველის მიერ გავრცელებული ინფორმაციით, აღნიშნულ სტრუქტურას ადგილობრივი თვითმმართველობის ორგანოს არაერთმა ყოფილმა თანამშრომელმა მიმართა. ისინი აღნიშნავდნენ, რომ დაკავებული თანამდებობებიდან გათავისუფლების თაობაზე განცხადება საკუთარი ნებით კი არა, ზემდგომი თანამდებობის პირების მოთხოვნის, მათზე განხორციელებული ზეწოლისა და მუქარის საფუძველზე დაწერეს. ომბუდსმენის აპარატში საჩივრები შევიდა იმ მოხელეთა მხრიდანაც, რომლებიც ზეწოლის მიუხედავად უარს აცხადებდნენ საკუთარი ინიციატივით განცხადების დაწერაზე. მსგავსი შინაარსის განცხადებები, სახალხო დამცველის აპარატმა, შემდგომი რეაგირებისთვის საქართველოს მთავარ პროკურატურას გადაუგზავნა, თუმცა, შედეგი ამ დრომდე არ მოჰყოლია. უჩა ნანუაშვილი მოუწოდებს ადგილობრივ მუნიციპალიტეტებს, რომ ატესტაციის მეორე ეტაპის ჩატარება მოხდეს კანონიერების, სამართლიანობის, საჯაროობის, გამჭვირვალობის, ობიექტურობისა და მიუკერძოებლობის პრინციპების დაცვით, რათა არ დაირღვეს ატესტაციაში მონაწილე პირთა კანონიერი უფლებები. ომბუდსმენის თქმით, არსებითი მნიშვნელობისაა კადრების შერჩევა მხოლოდ და მხოლოდ კანდიდატთა ცოდნის, გამოცდილებისა და პროფესიული უნარ-ჩვევების გათვალისწინებით. მხოლოდ ეს გარემოება იქნება განხორციელებული თვითმმართველობის რეფორმის წარმატებით დასრულების გარანტი. ამასთან, საქართველოს სახალხო დამცველი მოუწოდებს ადგილობრივი თვითმმართველობის ორგანოებს, იმ შემთხვევაშიც კი, როდესაც მოხელე პირადი განცხადების საფუძველზე ითხოვს დაკავებული თანამდებობიდან გათავისუფლებას, დეტალურად შეისწავლოს საქმისთვის არსებითი მნიშვნელობის მქონე გარემოებები და მხოლოდ ამის შემდეგ მიიღოს დასაბუთებული გადაწყვეტილება. ეს იქნება იმის საფუძველი, რომ არ მოხდეს ადამიანის უმნიშვნელოვანესი უფლების - შრომის უფლების დარღვევა.