საქართველოს საგარეო საქმეთა მინისტრმა, მაია ფანჯიკიძემ და მისმა მოადგილეებმა დავით ზალკალიანმა, თამარ ბერუჩაშვილმა, დავით ჯალაღანიამ და ვლადიმერ გურგენიძემ თანამდებობები დატოვეს. მაია ფანჯიკიძემ თანამდებობიდან წასვლის შესახებ განცხადება საგარეო საქმეთა სამინისტროში გააკეთა. "ჩემთვის დიდი პატივი იყო 2 წლის განმავლობაში მემსახურა ჩემი ქვეყნისთვის საქართველოს საგარეო მინისტრის პოზიციაზე. თავმდაბლობის გარეშე ვიტყვი, რომ გასული 2 წლის განმავლობაში ჩვენმა გუნდმა ქვეყნის საგარეო პოლიტიკის ასპარეზზე შესაძლებლობების მაქსიმუმს მიაღწია. ჩვენ მტკიცედ ვიდექით ევროპული და ევროატლანტიკური ფასეულობების დასაცავად. მნიშვნელოვან წარმატებებს მივაღწიეთ საგარეო პოლიტიკის ყველა პრიორიტეტული მიმართულებით. შევქმენით ევროპული და ევროატლანტიკური ინტეგრაციის თვისობრივად ახალი შესაძლებლობები. ხელი მოეწერა და ამოქმედდა ევროკავშირთან ასოცირების ხელშეკრულება. "ნატო"-მ მიიღო გადაწყვეტილება საქართველოსთვის თანამშრომლობის არსებითი პაკეტის შემუშავების შესახებ. მნიშვნელოვან პროგრესს მივაღწიეთ არაღიარების პოლიტიკის მიმართულებით და ორი სახელმწიფოთი შევამცირეთ აღიარებათა რიცხვი. გაიზარდა გაეროში რეზოლუციის მხარდამჭერთა რაოდენობა. მნიშვნელოვანი პროგრესი გვაქვს აშშ-სთან სტრატეგიული პარტნიორობის ფარგლებში. სერიოზული ნაბიჯები გადაიდგა რეგიონული თანამშრომლობის განვითრების კონტექსტში. და უმთავრესი, ჩვენ შევძელით და ფაქტობრივად გავაქარწყლეთ ის სკეპტიციზმი ჩვენს მოკავშირეებსა და პარტნიორ სახელმწიფოებში, რაც ახალი ხელისუფლების მოსვლის შემდეგ უკავშირდებოდა ჩვენი კურსის ევროპულ და ევროატლანტიკურ ორიენტაციას". მაია ფანჯიკიძე საქართველოს საგარეო საქმეთა მინისტრად 2012 წლის 25 ოქტომბერს დაინიშნა. მინისტრად დანიშვნამდე, მაია ფანჯიკიძე მონაწილეობდა პოლიტიკური კოალიცია "ქართული ოცნების" საქმიანობაში. 2012 წლის თებერვალში მაია ფანჯიკიძემ კოალიციის პრესსპიკერისა და ცენტრალური ოფისის ხელმძღვანელის თანამდებობა დაიკავა. პოლიტიკაში გადანაცვლებამდე მაია ფანჯიკიძემ დიპლომატიური კარიერის გზა გაიარა. ის იყო გერმანიის ფედერაციულ რესპუბლიკაში საქართველოს საგანგებო და სრულუფლებიანი ელჩი (2004-2007) და ნიდერლანდების სამეფოში საქართველოს საგანგებო და სრულუფლებიანი ელჩი (2007-2010). საგარეო უწყებაში მას სხვადასხვა თანამდებობა ეკავა, პირველი მდივნობიდან დაწყებული, დამთავრებული მინისტრის მოადგილეობით.