"პაპას ბაღის" მიმდებარე ტერიტორიაზე არსებული დაბინძურებული მიწისქვეშა გადასასვლელის პრობლემის მოგვარებას ადგილობრივი ხელმძღვანელობა მისი გაუქმებით გეგმავს. მოსახლეობის თქმით კი, ამ საკითხის გადაჭრა საზოგადოებრივი "ტუალეტის" აშენებით არის შესაძლებელი.
მიწისქვეშა გადასასვლელის ერთ-ერთი ამოსასვლელი დღეს ჩაკეტილია ხის ტოტებით, პლასტმასის ბოთლებით, სიგარეტის ნამწვავებითა და სხვა საყოფაცხოვრებო ნარჩენებით დაბინძურებული კიბეები _ ასეთი სურათი დაგხვდებათ გურჯაანის ცენტრში, თავისუფლების ქუჩაზე "პაპას ბაღთან" მდებარე მიწისქვეშა გადასასვლელთან. როგორც ადგილობრივი მაცხოვრებლები ამბობენ, მათ ეს მონაკვეთი რამდენჯერმე საკუთარი ძალებით გაასუფთავეს, მაგრამ ამით პრობლემა არ მოგვარებულა.
-"მთელი დღე აქ ვტრიალებ მაღაზიაში. ეხლა კიდევ არაუშავს, ცოტა რომ დაცხება ისეთი სუნი ამოდის, რომ ახლოს ვერ გაჩერდები. აქ თბილისის ტაქსები დგას. მძღოლები რასაც შეჭამენ, ნარჩენებს შიგ ყრიან. ტუალეტად აქვთ გამხდარი, ჩადიან და აბინძურებენ. იყო შემთხვევა, მეეზოვეებმა ქუჩა რომ დაგავეს, ნაგავი შიგ ჩაყარეს. რამდენჯერმე მე ჩავედი და ამოვასუფთავე, მაგრამ აზრი არ აქვს, ისევ იგივე მეორდება. ამიტომ თავი დავანებე. ადგილობრივმა ხელმძღვანელობამ აუცილებლად უნდა მიაქციოს ყურადღება," _ გვითხრა ქალბატონმა გულომ, რომელმაც გვარის დასახელება არ ისურვა.

ტაქსის მძღოლმა შოთა გიქორაშვილმა პრობლემის მოგვარების აუცილებლობაზე ისაუბრა.
-"ამ ადგილს დიდი ხანია ყურადღებას არავინ აქცევს. ისეა დაბინძურებული, იქ ჯდომა კი არა, ახლოს გავლაც შეგეზარება. მძღოლების გარდა გამვლელ-გამომვლელიც ჩადის და აბინძურებს. ეს იმის ბრალია, რომ ქალაქში ერთი საზოგადოებრივი ტუალეტი არ არის, რომ გაჭირვებული ადამიანი შევიდეს. მე არავის ხელს არ ვაფარებ, მაგრამ საპირფარეშოს უქონლობის გამო, ზოგი აქ ჩადის და ზოგი ახტალაზეც გადადის," _ გვითხრა მან.

ანალოგიური მდგომარეობაა ქ. გურჯაანის #2 საჯარო სკოლის წინ მდებარე მიწისქვეშა გადასასვლელშიც. როგორც კალოსუბნის მაცხოვრებლები ამბობენ, დღესდღეობით ამ გვირაბით სარგებლობა შეუძლებელია.
-"ძალიან არის დაბინძურებული. წყალი ჩამოდის, ნაგვით არის სავსე და საშინელი სუნიც დგას. აქ საბითუმო ბაზარია და მოვაჭრეები გვირაბს ტუალეტად იყენებენ. მთელი კალოსუბნის მოსახლეობას და ბავშვებს, რომლებიც სკოლაში თუ ბაღში დადიან, ყოველდღე ამ გზით უწევთ სარგებლობა. აუცილებლად უნდა მიექცეს ყურადღება. რაღაც ზომები გატარდეს ან ჯარიმა დააწესონ და მერე, ალბათ, ასეთ რამეს აღარ გააკეთებენ," _ გვითხრა ასმათ ჩალათაშვილმა.

როგორც ჩვენთან საუბარში გურჯაანის მუნიციპალიტეტის გამგებლის მოადგილემ ზვიად ყვირალაშვილმა აღნიშნა, ამ საკითხების გადაჭრა უახლოეს მომავალში იგეგმება.
-"თავისუფლების ქუჩაზე მდებარე მიწისქვეშა გადასასვლელი უნდა გავაუქმოთ. სამწუხაროდ, სტიქიამ შეგვიშალა ხელი და ამის გამო რაღაც საქმეებმა უკან დაიწია. ამოსუფთავება არანაირ შედეგს არ მოიტანს, იმიტომ, რომ ეს იქნება ერთჯერადი აქცია და მეტი არაფერი. ცალ მხარეს ის უკვე დაკეტიალია და ამ შემთხვევაში მას რაიმე დანიშნულება აღარ გააჩნია. ამ საკითხს გამგებელთანაც შევათანხმებთ და ყველაფერს აუცილებლად მიეხედება. ავტოსადგურში იყო ტუალეტი, მაგრამ არავინ ასუფთავებდა და გააუქმეს. ვფიქრობთ, ქალაქში მართლაც აუცილებელია იყოს საზოგადოებრივი ტუალეტი, მაგრამ არა ავტოსადგურის ტერიტორიაზე, არამედ ბაზრის თავში, ეკლესიასთან ახლოს, რადგან მოსახლეობა იქ უფრო ტრიალებს. პირადად მეც ასე ვფიქრობ, რომ ბაზრის თავის მიმდებარე ტერიტორიასთან უფრო მეტ საჭიროებას წარმოადგენს. მომავალში ეს პრობლემა აუცილებლად გადაწყდება. რაც შეეხება ქვევით, მეორე საჯარო სკოლასთან მდებარე გვირაბს, მისი გაუქმება შეუძლებელია, იმიტომ, რომ რკინიგზის დეპარტამენტის მიერ არის გაკეთებული და მისი არსებობა აუცილებელია. მოგეხსენებათ, მანდ საბითუმო ბაზარია და მოსახლეობა მართლაც აბინძურებდა ამ ტერიტორიას. ახლა ტუალეტი გაკეთდა და ვფიქრობთ, მდგომარეობა გამოსწორდება. რაც შეეხება გვირაბის განათებას, გადავხედავთ ჩვენს შესაძლებლობებს, ჩამოვყალიბდებით და როგორმე ამ საკითხსაც მოვაგვარებთ," _ გვითხრა ზვიად ყვირალაშვილმა.

მოსახლეობა კი ამ პრობლემების დროულად გადაჭრას ითხოვს, რადგან ზაფხული მოდის და აუტანელ სუნთან ერთად, მავნე მწერებისა და მღრღნელების პრობლემაც შეაწუხებთ. აქვე განვმარტავთ, რომ თავისუფლების ქუჩაზე მდებარე მიწისქვეშა გადასასვლელის პრობლემასთან დაკაშვირებით "სპექტრი" არაერთხელ წერდა. წინა ხელისუფლების დროს, გამგებელი შოთა უტიაშვილი პრობლემის მოგვარებას ასევე დემონტაჟის გზით გეგმავდა. მას შემდეგ, რაც მიმდებარე ტერიტორიაზე იუსტიციის სახლი აშენდა, ახალი გამგებელს დავით მესხიშვილს მიაჩნდა, რომ შესაძლოა დემონტაჟზე უკეთესი გამოსავალი მოეძებნათ და ფართი ქალაქის საკეთილდღეოდ გამოეყენებინათ. თუმცა, დაპირება დაპირებად დარჩა. რა გადაწყვეტილებას მიიღებს ახლანდელი ხელმძღვანელობა და მოგვარდება თუ არა საბოლოოდ ეს პრობლემა, ამას ალბათ დრო გვიჩვენებს.