გურჯაანის მუნიციპალიტეტის გამგებლის მოვალეობის შემსრულებელი, ემზარ ჯიქურაშვილი 2014 წლის "სოფლის მხარდაჭერის პროგრამის ფარგლებში" მოსახლეობასთან შეხვედრებს განაგრძობს. ამჯერად ის სამ სოფელს: მუკუზანს, ველისციხესა და ზეგაანს ესტუმრა და ადგილობრივ მაცხოვრებლებთან მომავალი წლის პრიორიტეტების შესახებ ისაუბრა. როგორც ყველა სოფელში, აქაც ერთი და იგივე პრობლემები გამოიკვეთა. წყალი, გაზი, შიდა საუბნო და სავარგულებში მისასვლელი გზები,-ეს ის ძირითადი საკითხებია, რომელებიც სამი სოფლის მოსახლეობამ წამოჭრა. ველისციხელებმა სოფელთან დამაკავშირებელი გზის შესახებ ისაუბრეს, რომლის რეაბილიტაციაც ერთი წლის წინ მუნიციპალური განვითარების ფონდის დაფინანსებით დაიწყო და დღემდე დაუსრულებელია. "ჩვენს სოფელში ძალიან ბევრი პრობლემაა. ერთ დროს კახეთში პირველი სოფელი, ეხლა ყველაზე ჩამორჩენილი და ასე ვთქვათ, გაუბედურებულია, უპატრონოდ არის დარჩენილი. ამ ფაქტზე თუნდაც ცენტრალური გზა მეტყველებს, სადაც მანქანას კი არა ადამიანსაც ვეღარ გაუვლია,"- აღნიშნა ველისციხის მკვიდრმა ვაჟა ქიტუაშვილმა. მისივე თქმით, სოფელში სხვა პრობლემებიცაა."უკვე ერთი თვეა, წყალი არ მოდის. არადა, თქვენც მოგეხსენებათ, ოჯახს რამდენი წყალი სჭირდება. მინდა დიდი მადლობა გადავუხადო ბიზნესმენებს, რომლებმაც რამდენიმე ადგილას ჭაბურღილი გააკეთეს და იქიდან ვეზიდებით. ესეც რომ არ იყოს, არ ვიცი, რა გვეშველებოდა." შეხვედრის ბოლოს მუნიციპალიტეტის გამგებლის მოვალეობის შემსრულებელი მოსახლეობას პრობლემების გადაჭრას დაპირდა. მარინა პეტრიაშვილი