არაერთი წელია, რაც გურჯაანში, ყაზბეგის ქუჩის მაცხოვრებლები გზის პრობლემაზე უშედეგოდ საუბრობენ. ამ საკითხზე განცხადება გამგეობაშიც შეიტანეს, მაგრამ რეაგირება არ მოჰყოლია. რამდენიმე დღის წინ კი, ადგილობრივებმა დახმარების თხოვნით "სპექტრის" რედაქციას მიმართეს. ყაზბეგის ქუჩის მოსახლეობის თქმით, გზა ისეა დაზიანებული, რომ მოძრაობა ტრანსპორტსაც უჭირს და ფეხით მოსიარულესაც. მდგომარეობას სხვა გარემოებაც ართულებს. ცენტრალურ ქუჩებთან დასაკავშირებლად ადგილობრივები საცალფეხო ბილიკით სარგებლობენ, რომელიც ეკალ-ბარდით ისეა დაფარული, თუ კარგად არ დააკვირდი, არც კი ჩანს. ყაზბეგის ქუჩაზე უწევს სიარული სოფელ გურჯაანის წერეთლისა და რუსთაველის ქუჩის მაცხოვრებლებსაც. -"გზაზე სულ ქვა-ღორღი ყრია და იმდენად არის დაზიანებულია, რომ ვეღარ დავდივართ. მშობელს ბავშვი ქუჩაში ვერ გამოუშვია, ეშინია არ დაეცეს და თავი არ გაიტეხოს. ცენტრალურ გზას რითაც უნდა დავუკავშირდეთ, ის ბილიკიც ცუდ მდგომარეობაშია. ადრე მანდ სამანქანო გზა გადიოდა, მაგრამ ახლა ფეხითაც ძლივს ჩავდივართ," _ გვითხრა გიორგი ხანიაშვილმა. პრობლემაზე ქუჩის სხვა მაცხოვრებლებიც საუბრობენ. -"საშინელ პირობებში ვცხოვრობთ. დიდი ხანია გზის პრობლემაზე ვლაპარაკობთ, მაგრამ ყურადღებას არავინ გვაქცევს. არც განათება გვაქვს, ამიტომ ღამე გარეთ ვერ გამოვდივართ, გვეშინია ოღრო-ჩოღრო გზაზე არ წავიქცეთ. ზამთარში უფრო ცუდი მდგომარეობაა. საცალფეხო ბილიკიც იმდენად მოუწესრიგებელია, რომ იმ დღეს ორი ადამიანი დაგორდა," _ აღნიშნა ბიჭიკო სურმანიძემ. როგორც ყაზბეგის ქუჩაზე მცხოვრები გურგენ ნატროშვილი ამბობს, დახმარებისთვის არქიტექტურის, ეკონომიკისა და ინფრასტრუქტურის განვითარების სამსახურს არაერთხელ მიაკითხა, მაგრამ ამ დრომდე რეაგირება არ მოჰყოლია. -"კარგად ხედავთ, გზა რას ჰგავს, მოხუცებს უფრო გვიჭირს და ვეღარ დავდივართ. მინდოდა ირაკლი მინდიაშვილი პირადად მენახა, მაგრამ რამდენჯერაც მივედი მითხრეს, სამსახურში არ არისო. პრობლემის მოგვარების თხოვნით განცხადება გამგეობაშიც შევიტანე. სამწუხაროდ, არავინ დაინტერესებულა," _ გვითხრა გურგენ ნატროშვილმა. აღნიშნულ საკითხზე განმარტება არქიტექტურის, ეკონომიკისა და ინფრასტრუქტურის განვითარების სამსახურის სპეციალისტმა გიორგი ამისულაშვილმა გააკეთა. -"პრობლემის შესახებ საქმის კურსში ვართ, ამ ქუჩის მაცხოვრებლებმა განცხადებაც შემოიტანეს. ჩასატარებელია მოხრეშვითი სამუშაოები. ადრე მანდ ასფალტი იყო, მაგრამ ახლა ამის საშუალება არ არის. ეს გზა ძალიან დახრამულია და ვიცი, რომ მანქანითაც ჭირს სიარული. მინდა გითხრათ, რომ სექტემბრამდე აუცილებლად გაკეთდება. საკითხი პროექტში გაწერილია. ტენდერში თანხები მორჩება და მანდაც ჩატარდება სამუშაოები." "სპექტრის" შეკითხვაზე, რომელ ტენდერს გულისხმობს ან თუ არ "მორჩა ტენდერიდან თანხა", როგორ გეგმავენ პირობის შესრულებას? _ გია ამისულაშვილმა გვიპასუხა: -"ეგ არ არის მანდ გასახმოვანებელი. ძალიან დაწვრილებით უნდა ახსნა, ამას ხალხი ვერ გაიგებს. საერთოდ, ტენდერიდან თანხები რომ რჩება, შემდეგ იქიდან სხვა სამუშაოებს ვასრულებთ. "ვაშლებში" ოთხი ქუჩა კეთდება, იქ დარჩა საკმარისი თანხა, რომელიც შეგვიძლია ყაზბეგის ქუჩის შესაკეთებლად გამოვიყენოთ. კონკრეტულად ამ ქუჩაზე შესასრულებელი სამუშაოების ხარჯთაღრიცხვა არ არის წარმოებული, მაგრამ პრიორიტეტადაა დასახელებული. პატარა ქუჩაა და მცირე თანხა დასჭირდება. ივლისის თვის პირველ ნახევარში ხარჯთაღრიცხვაც შედგება." რაც შეეხება ბილიკს, რომლითაც მოსახლეობა თბილისის ქუჩას უკავშირდება, გია ამისულაშვილი განმარტავს: -"მანდ სამანქანე გზა ვეღარ გაკეთდება, მაგრამ კიბეების მოწყობას ვფიქრობთ. თუმცა ეს ჯერ იდეის დონეზეა და გადაწყვეტილი არაფერია." ყაზბეგის ქუჩის მდგომარეობა, გურჯაანის მუნიციპალიტეტის თითქმის ყველა სოფლის პრობლემის იდენტურია. საკითხის გადაჭრას ხელმძღვანელობა ყველგან გზების მოხრეშვით გეგმავს, მაგრამ გამოცდილებამ აჩვენა და მოსახლეობაც მუდმივად საუბრობს, რომ გზების მოხრეშვა პრობლემას მხოლოდ მცირე ხნით აგვარებს. წვიმას ხრეში მიაქვს, ფული წყალში იყრება და პრობლემა კი ისევ მოსაგვარებელი რჩება. თამარ კაპანაძე