გურჯაანის მუნიციპალიტეტის ხევებზე არსებული რთული სიტუაცია არაერთხელ გამხდარა მოსახლეობის დაზარალების მიზეზი. მუნიციპალიტეტის გამგეობაში აცხადებენ, რომ წელს ხევების გაწმენდითი სამუშაოები ხარისხიანად განხორციელდა და ჭარბი ნალექი ადგილობრივებს პრობლემას აღარ შეუქმნის. მოსახლეობის ერთი ნაწილი კი ბელახევზე დამატებითი სამუშაოების ჩატარებას ითხოვს. გურჯაანელების თქმით, ამ დროისთვის არასახარბიელო მდგომარეობაა შექმნილი "ბელახევზე". სასოფლო-სამეურნეო სავარგულებამდე ე.წ. "რცხილიაანთ ღელეზე" მისასვლელად სწორედ ეს ხევი უნდა გაიარონ, რომელიც სტიქიის შედეგად სავალალო მდგომარეობაშია. ნაკვეთების მეპატრონეების თქმით, ვენახებამდე მისასვლელი გზა შედარებით მოწესრიგდა. თუმცა ავტომობილით გადაადგილება მაინც შეუძლებელია. -"ამას წინათ მსუბუქი მანქანით მოდიოდა გლეხი თავის ნაკვეთში სამუშაოდ, მაგრამ ვერ გადმოვიდა, ხევში ჩავარდა და დიდი მანქანით ამოათრიეს. ძალიან ბევრი ვიცი, ვინც ნაკვეთში კალოსუბნიდან უვლის, იმიტომ, რომ აქ გადასვლა შეუძლებელია. როცა ნაწვიმია და წყალი ადიდებულია, მაშინ ვერც ფეხით გადავდივართ, წყალში ხომ ვერ გავივლით. იმდღეს საქონელი გვყავდა საბალახოდ წაყვანილი. ძლიერი წვიმა და სეტყვა რომ წამოვიდა, პირუტყვი დაფრთხა და ხევზე ძლივს გადმოვიყვანეთ. ერთი ფეხით გამოვასწარით, ისეთი წყალი მოვარდა, საქონელს უეჭველად წაგვართმევდა. მერე ყველაფერზე პასუხისმგებელი მენახირეა. მანდ ან ბოგირი უნდა გაკეთდეს, ან ხიდი, რომ უსაფრთხოდ გადავიდეს მანქანაც, ფეხით მოსიარულეც და საქონელიც. ამას წინათ, ვითომ რაღაცას აკეთებდნენ, მაგრამ დიდი არაფერი შეცვლილა. თუ წესიერად არ მიხედეს, მანდ გზა ისევ ჩაიხერგება," _ გვითხრეს მწყემსებმა. გურჯაანის მუნიციპალიტეტის გამგეობის არქიტექტურის, ეკონომიკისა და ინფრასტრუქტურის განვითარების სამსახურში განგვიცხადეს, რომ წელს დაგეგმილი ხევების გაწმენდითი სამუშაოები თითქმის დასრულებულია. -"ბელახევის 50 მეტრიანი მონაკვეთი უკვე გასუფთავებულია. არხის ზემოდან გაიწმინდა 500 მეტრიანი, ხოლო ქვემოდან _ 400 მეტრის ზოლი. ბელახევზე განხორციელებული სამუშაოები 21 000 ლარად იყო შეფასებული, მაგრამ ტენდერში გამარჯვებულმა კომპანიამ 8000 ლარად გააკეთა," _ გვითხრა გურჯაანის მუნიციპალიტეტის გამგეობის არქიტექტურის, ეკონომიკისა და ინფრასტრუქტურის განვითარების სამსახურის სპეციალისტმა გია ამისულაშვილმა. მისივე თქმით, აღნიშნულ მონაკვეთში ბოგირი არასოდეს ყოფილა და არც განიხილება. -"ბოგირი არა, მაგრამ მაგ ტერიტორიაზე ხიდის აგება გაცილებით მიზანშეწონილია. თუმცა წელს ეს არ არის დაგეგმილი. ძალიან დიდი ხიდის აგებაა საჭირო. წლევანდელ სამუშაოებში და ხარჯთაღრიცხვაში ჩასმული არ არის," _ გვითხრა მან და ასევე უკვე გაწმენდილი ხევების შესახებაც ისაუბრა. -"ნავთისხევზე გვირაბი იყო გაჭედილი. საკმაოდ რთული სამუშაოები იყო შესასრულებელი და წელს ეს პროექტი განხორციელდა. 150 მეტრის გვირაბი და ხევის ის ძირითადი მონაკვეთი გაიწმინდა, საიდანაც ქვა-ღორღი მოდიოდა. ჩატარებული სამუშაოები იმის პირობას იძლევა, რომ რამდენიმე წლის განმავლობაში რაიონს სტიქია საფრთხეს აღარ შეუქმნის. გვირაბის გასუფთავება 34 000 ლარი დაჯდა. ასევე მოხდა ვაზისუბნის ხევის რეაბილიტაცია, რომელზეც 53 300 ლარამდე დაიხარჯა." ინფრასტრუქტურის სამსახურში განგვიცხადეს, რომ დარჩენილი ხევების პრობლემური მონაკვეთებიც უახლოეს მომავალში გაიწმინდება. -"ახტალის ხევზე ფსკერია გაფუჭებული, რამაც ჯებირის დანგრევა გამოიწვია. უკვე გამოცხადებულია ტენდერი 36 000 ლარზე. ასევე დაგეგმილია ჩალაუბნის ხევზე ტენდერის გამოცხადება, საუბარია 37 000 ლარზე," _ ამბობს გია ამისულაშვილი. სტიქიის შედეგად მოშლილი ინფრასტრუქტურის, დაზიანებული გზების, ადიდებული ხევებისა და განადგურებული ნაპირსამაგრი ჯებირების შესახებ მასალა "სპექტრს" გასულ წლებშიც არაერთხელ მოუმზადებია. მოსახლეობა იმედს გამოთქვამს, რომ განხორციელებულ სამუშაოებს ერთჯერადი სახე ახლა მაინც აღარ ექნება. ლანა გულოშვილი