ლანა გულოშვილი

რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილმა დაზარალებული მოსახლეობა კომპენსაციის გაცემის წესებსა და პროცედურებზე ინფორმირების მიზნით 25 იანვარს მოინახულა. რამდენიმე დღეა დაზარალებულები განსაზღვრულ თანხას `ქართუ ბანკის~ ფილიალში უკვე იღებენ, თუმცა ამ პროცესმა ზოგიერთი მათგანის უკმაყოფილება გამოიწვია. სოფელ კალაურის ცენტრში შეკრებილი მოსახლეობა ინფრასტრუქტურის მინისტრის მოადგილესა და ხელისუფლებას გაწეული დახმარებისთვის მადლობას უხდიდა. "ხალხის უმრავლესობა ბატონი ბიძინას მადლიერია. სტიქია სხვა წლებშიც ყოფილა, მაგრამ გლეხს ასე არავინ დახმარებია. ჩემი ოჯახი ამ ზაფხულს 100%-ით დაზარალდა. ორი ჰექტარი დაგვესეტყვა. მთავრობამ 13 000 ლარი მოგვცა, რისთვისაც მადლობას ვუხდით," _ ამბობს ლალი ჯაჭვაძე.

ხელისუფლების გადაწყვეტილებით კმაყოფილია ნიკოლოზ ჭოტიშვილიც. მას რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი სახლში ეწვია დაEსასოფლო-სამეურნეო სამუშაოებზე ესაუბრა. `სპექტრთან~ კომენტარში ამბობს, რომ კომპენსაციით ბანკის ვალის დაფარვას აპირებს. "მადლობელი ვარ, რომ ასე დამეხმარნენ. მეც და ჩემმა თანასოფლელებმაც ამოვისუნთქეთ. ბანკის კრედიტის მოცილებას შევძლებთ. შემდეგ უკვე დავიწყებთ ნაკვეთების დამუშავებას," _ გვითხრა ნიკოლოზ ჭოტიშვილმა. ამის მიუხედავად მინისტრის მოადგილეს საყვედური მაინც გაუწიეს. თინა ნაქევხრიშვილი მიიჩნევს, რომ საკომპენსაციო სიებში ისიც უნდა მოხვედრილიყო.

"სტიქიამ ყველა დაგვაზარალა, გაგვანადგურა. ნაკვეთი არ მაქვს, მაგრამ სახლში რაც მქონდა დათესილი არაფერი აღარ დამრჩა. მე და ჩემნაირებმა რა ვქნათ?! კომპენსაცია არ გვეკუთვნის? ერთი თვის პენსია წინასწარ მაქვს გამოტანილი, რომ როგრღაც თავი ვირჩინოთ." ქალბატონს, მინისტრის მოადგილე და ადგილობრივი ხელისუფლება დაპირდა, რომ მის მდგომარეობას უახლოეს მომავალში შეისწავლიან. თენგიზ შერგელაშვილმა ვიზიტის შესახებ ჟურნალისტებთანაც ისაუბრა."რამდენიმე დღეა, კომპენსაციების გაცეამა დაიწყო. ვხვდებით მოსახლეობას, ვისმენთ მათ აზრს. როგორც ჩანს, ხალხი კმაყოფილია და ეს მნიშვნელოვანია. წელს ასევე იგეგმება პროექტები სოფლის მეურნეობის განვითარების კუთხით," _ განაცხადა მან.

სოფლის ადმინისტრაციულ შენობებში უკვე განთავსდა სიები, სადაც მოქალაქეებს საკუთარი ვინაობის ამოკითხვა შეუძლიათ. ამ ინფორმაციას კალაურელებიც ამოწმებდნენ. "19 ივლისის სტიქიამ მიწასთან გაგვასწორა. ეხლა ვკითხულობ გვარ-სახელებს. იმედია ჩვენი ოჯახიც აღმოჩნდება სიაში. წელს რომ პამიდორი მედგა, კარტოფილი და ლობიო მეთესა, დიდი ხანია ასეთი მოსავალი არ მქონია, მაგრამ რად გინდა, ყველაფერი გამინადგურდა," _ გვითხრა ცისანა ყაჭიაშვილმა. `სამი ჰექტარი ატმის ბაღი და ვენახები დამესეტყვა. ეხლა ვამოწებ ვარ თუ არა სიაში. ასეთი დახმარებების დარიგება ხალხისთვის ძალიან საჭირო და აუცილებელი იყო," _ ამბობს თეიმურაზ ჩეკურიშვილი.

დაზარალებული მოსახლეობა კუთვნილ თანხას 21 იანვრიდან თელავის `ქართუ ბანკის~ ფილიალში იღებს. ინფრასტრუქტურის სამინისტროს ცნობით, ბაზაში სულ 28 500 ოჯახია შეტანილი. ყველა მათგანი 2012 წლის ივლის-აგვისტოს თვეში მოვარდნილი სტიქიის შედეგადაა დაზარალებული. აღნიშნული დახმარების განსახორციელებლად, `ბანკმა ქართუ~-მ 95 000 000 ლარი გამოყო. ამის მიუხედავად, არიან მოქალაქეები, რომელბსაც კომპენსაციად მიზერული თანხა ერგო (12 ლარი, 40 ლარი). ამის გამო ისინი იმედგაცრუებულები დარჩნენ. სამინისტროს წარმომადგენლები კი აცხადებენ, რომ თითოეულ დაზარალებულზე თანხის ოდენობა უკვე აღებული დახმარების მიხედვით განისაზღვრა. „გაცემული კომპენსაციები გაიქვითა. მაგალითად, თუ ზარალის ოდენობა შეადგენდა 1 800 ლარს და 1 500 ლარი უკვე მიღებული აქვს ადამიანს, გასაცემ თანხად განისაზღვრა 300 ლარი. ამან გამოიწვია ის ხარვეზი, რომ ერთმა დაზარალებულმა 12 ლარი აიღო. 28 000 ადამიანში სულ 9 აღმოჩნდა ისეთი, რომლის შემთხვევაშიც მიზერამდე მიახლოებული იყო ჩვენს მიერ განსაზღვრული ზარალი და უკვე აღებული თანხა. უბრალოდ რომ გაგვენულებინა, 12 ლარი დავამატეთ, ასე რომ არ მოვქცეულიყავით, ეს ფაქტი ტელევიზიებისთვის სატრიალო სიუჟეტად არ იქცეოდა. შევცდით, რომ ის 12 ლარი ნულიანად არ გადავაკეთეთ, ასეთი 9 შემთხვევა იყო და ამის შემდეგ აღარ გვექნება,“ – განმარტა თენგიზ შერგილაშვილმა, თელავში, ჩართულობის ცენტრში დაზარალებულებთან შეხვედრისას. კომპენსაციების გაცემა რამდენიმე კვირის განმავლობაში გაგრძელდება.