ცენტრალურ მაგისტრალზე მდებარე მიწისქვეშა გადასასვლელები უკვე წლების განმავლობაში მოუგვარებელ პრობლემად რჩება.მიუხედევად იმისა, რომ ამ ხნის განმავლობაში ადგილობრივი ხელმძღვანელობა რამდენჯერმე შეიცვალა, ამ საკითხით კონკრეტულად არავინ დაინტერესებულა.
როგორც ჩვენთან საუბარში თავისუფლების ქუჩა 24–ში მცხოვრებმა ნათელა ნათიძემ აღნიშნა, საკითხის მოგვარებას რამდენჯერმე შეეცადა, მაგრამ უშედეგოდ.


"ამ გადასასვლელზე უკვე დიდი ხანია ვდავობ. პირდაპირ ჩემს წინ არის, ვერც კარები გამიღია და ვერც ფანჯარა. საშინელი სუნი ამოდის, მითუმეტეს მაშინ, როდესაც წვიმს. როგორც ხედავთ, ტყედ არის ქცეული, შიგ თაგვები და ბაყაყები დადიან. გარდა ამისა, საყოფაცხოვრებო ნარჩენები ყრია და გამვლელ–გამოვლელი ტუალეტადაც იყენებს. სანამ შემეძლო, დასუფთავების სამსახურშიც ვიყავი და გამგეობის ინფრაქტრუქტურაშიც, მაგრამ ყურად არავინ იღო ჩვენი გასაჭირი. შოთა უტიაშვილის გამგებლობის პერიოდში, "პაპა და შვილიშვილის" ძეგლი გზის იქითა მხარეს გადაიტანეს. მოვიყვანე მაშინ შოთა და ვაჩვენე რა მდგომარეობაც იყო. არანაირი რეაგირება არ ჰქონია, გაბრუნდა და წავიდა. წლების განმავლობაში ამდენი ხელისუფლება გამოიცვალა და აქაურობით დღემდე არავინ დაინტერესებულა. არც ხალხისთვის უკითხავთ აზრი გვაწუხებს თუ არა რამე," – გვითხრა მან.

გურჯაანის მუნიციპალიტეტის გამგებლის მოადგილის დიმიტრი კალატოზიშვილის თქმით,ამ საკითხით გამგეობაში უკვე დაინტერესდნენ და ჩამოყალიბების პროცესში არიან. "მიწისქვეშა გადასასვლელი ადრე ერთ მთლიან კომპლექსს წარმოადგენდა, იუსტიციის სახლის აშენების შემდეგ შუა ნაწილი დაიკეტა, დარჩენილია ორი მხარე, რომელიც დღესდღეობით ანტისანიტარიის ბუდეს წარმოადგენს. ჩემი მოსვლიდან დაახლოებით ერთი კვირის შემდეგ, ინფრასქტრუქტურის სამსახურთან ერთად, გავედი ადგილზე და დავათვალიერე. ამჟამად ჩამოყალიბების პროცესში ვართ. დღეის მდგომარეობით კონკრეტული მოსაზრებები არ გვაქვს.დაბლა თავისუფალი ფართია და გვინდა ისეთი რაღაც გავაკეთოთ, რაც ქალაქს გამოადგება.მოსახლეობიდან ჩვენთან ამ საკითხზე ჯერ არავინ მოსულა, მაგრამ თუკი მოვა, მათი საჩივარი სამართლიანი იქნება," – აღნიშნა მან.

თავისუფლების ქუჩაზე არსებული მიწისქვეშა გადასასვლელების პრობლემის შესახებ, "სპექტრი" წინა ხელისუფლებების დროსაც არაერთხელ წერდა. მაშინ ხალხს პრობლემის მოგვარებას ყოფილი გამგებლები: შოთა უტიაშვილი და დავით მესხიშვილი ჰპირდებოდნენ, მაგრამ დაპირება დაპირებად დარჩა. მოაგვარებს თუ არა ერთხელ და სამუდამოდ პრობლემას ახალი ხელმძღვანელობა , ამას უკვე დრო გვიჩვენებს.

ამავე თემაზე
მიწისქვეშა გადასასვლელის დემონტაჟი ახალი ხელისუფლებისთვისაც პრიორიტეტია

დავით მესხიშვილი: "დემონტაჟზე ადვილი არაფერია, მაგრამ შესაძლოა ეს ფართი უკეთესად მოვიხმაროთ"

დაბინძურებული მიწისქვეშა გადასასვლელის მოწესრიგების მარტივი გზა _ დემონტაჟი