2011 წლის ზაფხულში გურჯაანში ცენტრალურ მაგისტრალზე შადრევნის მშენებლობა დაიწყეს, რისთვისაც 48 ათას 600 ლარი გაიხარჯა. მშენებლობის პედიოდში, პროცესი რამდენჯერმე შეაჩერეს და იერი შეუცვალეს, შედეგად კი გურჯაანელებმა უსახური კონსტრუქცია მიიღეს. ამის შესახებ გაზეთი `სპექტრი~ 2011 წლის #20 (319)-ში და 2012 წლის #9 (338)-ში წერდა. მაშინ ამ საკითხზე `სპექტრმა~ გურჯაანის მოსახლეობა გამოკითხა. საზოგადოების აზრი ორ ნაწილად გაიყო: ზოგს მოსწონდა-ზოგს არა. უმრავლესობის თქმით, შადრევანმა ქალაქის იერსახე კი არ გაალამაზა, უფრო დაამახინჯა. ზოგმა თონეს შეადარა, ზოგმა ჩამქრალი ვულკანი უწოდა, ზოგმა ანეგდოტიც კი მოიგონა. ამის გამო მაშინდელი გამგებელი შოთა უტიაშვილი დაგვემდურა და ინტერვიუზე მისულებს პასუხი იმ მიზნით არ გაგვცა, რომ ჩვენზე ნაწყენი იყო. ორი წლის განმავლობაში შადრევანში წყალი ზაფხულში მხოლოდ რამდენჯერმე გაუშვეს, ეს ძირითადად რაიონში პრეზიდენტის ან სხვა რომელიმე საპატიო სტუმრის ჩამოსვლის დროს ხდებოდა. ზამთრის განმავლობაში კი უფუნქციოდ იყო, მიზეზად ხან ყინვები, ხან კი ძრავის გაუმართაობა სახელდებოდა. ბოლო დროს საზოგადოებაში ის აზრიც გავრცელდა, რომ მისი დემონტაჟი იგეგმება.

"ამ ადგილას გამწვანება და ყვავილები იყო. ეხლა კი ვერც გაიგებ რა არის. წყალი მხოლოდ ზაფხულში მოდის ხოლმე და ისიც იშვიათად. კარგი იქნება თუ აიღებენ," _ გვითხრა ტაქსის მძღოლმა, რომელმაც სახელი და გვარი არ გაგვიმხილა. როგორც გურჯაანელები ამბობენ, შადრევანის დემონტაჟი თუ არა, მისი იერსახის შეცვლა მაინც აუცილებელია. "ქალაქის გასალამაზებლად სიახლეები აუცილებელია, მაგრამ ეს შადრევანი ჩემი აზრით ძალიან უშნოა, მითუმეტეს კი იუსტიციის სახლის ფონზე, ამიტომ ვფიქრობ, ეს კონსტრუქცია უნდა რამენაირად გაალამაზონ," _ გვითხრა მანანა მედულაშვილმა. იმის გასარკვევად, ნამდვილად იგეგმება თუ არა უახლოეს პერიოდში შადრევანის დემონტაჟი, გურჯაანის მუნიციპალიტეტის საკრებულოს თავმჯდომარის მოადგილეს ალექსანდრე სირბილაშვილს მივმართეთ. `შადრევნის დემონტაჟი ბიუჯეტში გათვალისწინებული არ არის. მისი აშენება თუ დემონტაჟი თავიდანვე საკრებულოს გადასაწყვეტი არ იყო, ეს ძირითადად გამგეობის და ინფრასტრუქტურის სამსახურის კომპეტენციაა. თავის დროზე მისი კონსტრუქცია მაშინდელი გამგეობის მიერ ერთსულოვნად იყო მოწონებული. ჩემი აზრით კი, შეიძლებოდა შადრევანი უფრო პატარა და ლამაზი ყოფილიყო,~ _ გვითხრა მან და გზაგამყოფის საკითხსაც შეეხო.

"რაც შეეხება გზაგამყოფებს, მთავარ მაგისტრალზე ის აუცილებელია, ხოლო უშუალოდ ნონეშვილის პროსპექტზე საჭირო ნამდვილად არ იყო.~ გურჯაანის მუნიციპალიტეტის გამგებლის მოვალეობის შემსრულებელი ჯონი ოსიაშვილი კი ამ საკითხზე ჯერ არ ჩამოყალიბებულა, მაგრამ ფიქრობს რომ ცვლილებები აუცილებლად მოხდება. `პირადად ჩემი აზრი თუ გაინტერესებთ, შადრევანი არ მომწონს. კარგი იქნება თუ საშუალება მოგვეცემა და მინიმალური დანახარჯებით შევძლებთ მისი იერსახის შეცვალას. ჯერ არ ვიცით, მაგრამ აუცილებლად შევისწავლით ვინ გააკეთა და რა პრინციპით ხელმძღვანელობდა, საიდან აიღო ასეთი `ღირშესანიშნავი~ პროექტი. რომ შეიცვლება ეს უდავოა, მაგრამ როგორ მოხდება ეს ყველაფერი, ჯერჯერობით ჩამოყალიბებული არ ვარ. არ მინდა უფრო უარესი რამ მივიღოთ. არ ვიცი რა ჰქონდა ჩაფიქრებული მის პროექტანტს, რა უნდა მიეღო: შადრევანი, თონე თუ სხვა რამ," _ გვითხრა ჯონი ოსიაშვილმა და იქვე დასძინა: `ინფრასტრუქტურული პროექტებისთვის ბიუჯეტში გვაქვს თანხები, უბრალოდ უნდა დავალაგოთ რა მიმართულებით უნდა გაიხარჯოს. პირველ რიგში გათვალისწინებული გვაქვს ხევების სათავეების გაწმენდა. ასევე უნდა მოხდეს მთავარ ქუჩაზე მდებარე გზაგამყოფების დემონტაჟი, რომელიც ავარიულ სიტუაციებს ქმნის. ვგეგმავთ კულტურის სახლის მიმდებარე ტერიტორიის იერსახის შეცვლას. მარტო ქვიშა რომ ჩაყარეს და გაანებეს თავი, ამას გაკეთება სჭირდება. მოკლე დროში კომპლექსურად განვიხილავთ კულტურის სახლის მიმდებარე ტერიტორიას, შადრევანს და მთავარი ქუჩის გზაგამყოფებს. შემდეგ კი მოხდება მათი იერსახის შეცვლა,~ _ გვითხრა მან. აღნიშნული საკითხის თაობაზე გურჯაანის მუნიციპალიტეტის ყოფილ გამგებელს შოთა უტიაშვილს ვესაუბრეთ, რომელმაც გვთხოვა მოგვიანებით ტელეფონით დავკავშირებოდით, რადგან კომენტარზე უნდა ჩამოყალიბებულიყო. მაგრამ ჩვენს სატელეფონო ზარებს აღარ უპასუხა. მოსახლეობა კი იმედოვნებს, რომ შადრევნის იერსახის შეცვლა ახალი მთავრობის ხელში მაინც იქნება შესაძლებელი.