იყალთოში ქვევრის სახლის მშენებლობა მიმდინარეობს. სამსართულიანი ადმინისტრაციული შენობა და ერთსართულიანი ქვევრის დასამზადებელი საამქრო, იყალთოს მონასტრის მიმდებარე ტერიტორიაზე განთავსდება. სამშენებლო სამუშაოები მუნიციპალური განვითარების ფონდის აღმასრულებელმა დირექტორმა ჯუანშერ ბურჭულაძემ მოინახულა. სკოლა - სახელოსნოს მშენებლობას საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი მსოფლიო ბანკის ფინანსური მხარდაჭერით ახორციელებს და მისი ღირებულება 3 მილიონამდე ლარია. ობიექტს ექნება მუზეუმი სადაც თიხის ჭურჭელი გამოიფინება, ასევე განთავსდება ბიბლიოთეკა და ინტერნეტ-კაფე. ტურისტებს საშუალება ექნებათ ისწავლონ თიხის ჭურჭლის დამზადება. მშენებლობის დასრულების შემდეგ ქვევრის სახლში ადგილობრივი მოსახლეობა დასაქმდება.